Tbilisi shahar sudi Gruziya sobiq prezidenti Mixail Saakashvilini davlat mablag‘larini o‘ta yirik miqdorda o‘zlashtirishda aybdor deb topdi va uni to‘qqiz yilga ozodlikdan mahrum qildi.
Sudya Badri Kochlamazashvilining so‘zlariga ko‘ra, ushbu ish bo‘yicha Davlat xavfsizlik xizmati sobiq rahbari Teymuraz Janashiya ham ayblanmoqda va unga 300 ming lari miqdorida jarima to‘lash belgilangan. Ayblanuvchilarga byudjetdan 9 million lari (taxminan 2 million AQSh dollari) o‘zlashtirish aybi qo‘yilgan.
Tbilisidagi Vivamed klinikasidan videokonferensiya orqali to‘g‘ridan to‘g‘ri efirga chiqqan Saakashvili o‘zining sog‘lig‘i tufayli hukmni kechiktirishni so‘radi, biroq sud bu iltimosni rad etdi. Saakashvili aybdor emasligini ma’lum qilgan.
Saakashvili 2021-yil 29-sentyabr kuni yashirincha Gruziyaga kelgan. 1-oktyabrda u Tbilisida qo‘lga olinib, Rustavi shahridagi qamoqxonaga joylashtirilgan. Sobiq prezident ochlik e’lon qilgan. 8-noyabr kuni u qarindoshlari va advokatlari roziligisiz Rustavidagi qamoqxonadan Tbilisining Gldani tumanidagi qamoqxona shifoxonasiga o‘tkazilgan. 20-noyabrda Saakashvili Gori shahridagi harbiy gospitalga ko‘chirilgan va u yerda ochlikni to‘xtatgan. 2022-yil 12-maydan buyon u Tbilisidagi Vivamed fuqarolik klinikasida davolanmoqda.
Gruziyada Saakashvili bir nechta jinoyat ishlarida ayblanmoqda. U o‘zining hibsga olinishi noqonuniy ekanini va unga qo‘yilgan ayblovlar soxtalashtirilganini ta’kidlamoqda.
Ma’lumot uchun, Saakashvili avvalroq olti yilga ozodlikdan mahrum etilgan edi. Mtavari TV xabariga ko‘ra, yangi hukm uning qamoq muddatini yana uch yilga uzaytirdi.
Izoh (0)