Грузиянинг ҳукмрон “Грузия орзуси — Демократик Грузия” партияси парламентга грантлар тўғрисидаги қонунга ўзгартириш киритишни таклиф қилди. Унга кўра, Грузия фуқароси ёки мамлакатда фаолият юритаётган ташкилот ҳукуматнинг олдиндан рухсатисиз бундай маблағларни ололмайди. Бу ҳақда “Грузия орзуси” фракцияси раисининг биринчи ўринбосари Ираклий Кирцхалия маълум қилди.
Унинг таъкидлашича, бундай чекловлар ташқи кучларнинг Грузияда “Молотов коктейлини отишни улуғлаш” кампаниялари, зўравонлик ҳаракатлари ёки бошқа бузғунчи фаолиятларни молиялаштиришига йўл қўймаслик учун зарур.
Янги қоида чет элда таълим олиш ёки илмий фаолият учун бериладиган грантларга, шунингдек, спорт уюшмаларига тааллуқли бўлмайди. Қонунни тезлаштирилган тартибда қабул қилиш режалаштирилмоқда.
Сиёсатчининг қўшимча қилишича, грантлар ажратилишини Грузия ҳукумати ҳузуридаги Коррупцияга қарши кураш бюроси назорат қилади. Агар олувчи маҳаллий ҳокимиятнинг рухсатисиз чет эл маблағларини олса, у грант миқдорининг икки баравари миқдорида жаримага тортилади.
Грузия парламенти 1 апрель куни АҚШда амалда бўлган ФАРА қонунининг айнан нусхаси бўлган чет эл агентлари тўғрисидаги қонунни қабул қилди. 2024 йилда қабул қилинган “Чет эл таъсирининг шаффофлиги тўғрисида”ги қонундан фарқли ўлароқ, янги қонун жиноий жавобгарликни назарда тутади ва жисмоний шахсларга ҳам татбиқ этилади.
Изоҳ (0)