Baxtiyor Ibragimov O‘zbekistonning Slovakiyadagi birinchi elchisi (qarorgohi Vena shahrida joylashgan) bo‘ldi. Bu haqda 7-mart kuni “Dunyo” axborot agentligi xabar berdi.
Qayd etilishicha, Bratislavadagi “Grassalkovichlar” saroyida bo‘lib o‘tgan tantanali marosimda u mamlakat prezidenti Peter Pellegriniga ishonch yorlig‘ini topshirdi.
Marosimdan so‘ng o‘tkazilgan muloqot chog‘ida O‘zbekiston va Slovakiya o‘rtasidagi hamkorlikning hozirgi holati va uni rivojlantirish istiqbollari muhokama qilindi. Tomonlar so‘nggi yillarda ikki tomonlama munosabatlar sifat jihatidan yangi bosqichiga ko‘tarilayotganini ta’kidladi. Shuningdek, 2025-yilda siyosiy, savdo-iqtisodiy va madaniy-gumanitar sohalarda salmoqli qo‘shma tadbirlar belgilangani qayd etildi.
Baxtiyor Ibragimov 2025-yilning yanvarida Albaniya prezidenti Bayram Begayga O‘zbekistonning ushbu mamlakatdagi elchisi (qarorgohi Vena shahrida joylashgan) sifatidagi ishonch yorlig‘ini topshirgandi. U 2023-yil noyabridan O‘zbekistoning Avstriyadagi elchisi lavozimida ham ishlab kelmoqda.
Shuningdek, u 2023-yilda shtab kvartirasi Vena shahrida joylashgan YXHT, BMT Giyohvand moddalar va jinoyatchilikka qarshi kurashish boshqarmasi, Yadro sinovlarini keng qamrovli taqiqlash to‘g‘risidagi shartnoma tashkiloti, XAEA kabi xalqaro tashkilotlardagi O‘zbekistonning rasmiy vakili sifatida ham akkreditatsiya qilingan.
6-mart kuni Shavkat Mirziyoyev 6 ta davlat — Misr, Italiya, Qirg‘iziston, Belarus, Gruziya va Turkiyadan yangi tayinlangan elchilardan ishonch yorliqlarini qabul qilib olgandi.
Izoh (0)