Ruanda hukumati Belgiya bilan diplomatik munosabatlarni uzib, qirollikning barcha diplomatlariga 48 soat ichida mamlakatni tark etishni buyurdi. Bu haqda Ruanda Tashqi ishlar vazirligi ma’lum qildi.
“Ruanda hukumati bugun Belgiya hukumatini diplomatik munosabatlarni uzish to‘g‘risidagi qarori haqida xabardor qildi. Ruandaning bu qarori bir qancha omillarni sinchkovlik bilan o‘rganib chiqishdan so‘ng qabul qilindi. Bu omillarning har biri Belgiyaning o‘zining neokolonial xomxayollarini saqlab qolishga qaratilgan nochor urinishlari bilan bog‘liq”, deyiladi vazirlik bayonotida.
“Ruandadagi barcha belgiyalik diplomatlar 48 soat ichida mamlakatni tark etishlari shart. Vena konvensiyasiga muvofiq, Ruanda Belgiyaning Kigalidagi diplomatik vakolatxonasi binolari, mulki va arxivlarini himoya qilishni ta’minlaydi”, deya qo‘shimcha qilgan vazirlik.
Bayonotda ta’kidlanishicha, Belgiya uzoq vaqtdan beri, ayniqsa Kongo Demokratik Respublikasi (KDR) sharqidagi davom etayotgan mojaroda Ruandaga nisbatan doimiy ravishda xoinlik qilib kelmoqda va bu mojaroda Belgiya “ayniqsa Ruandaga qarshi harakatlarda shafqatsiz tarixiy rol” o‘ynamoqda.
“Bugungi kunda Belgiya mintaqaviy mojaroda ochiq-oydin bir tomonga o‘tib oldi va turli xalqaro maydonlarda Ruandaga qarshi tizimli ravishda chiqishlarni davom ettirmoqda. U Ruandani ham, butun mintaqani ham beqarorlashtirish maqsadida, yolg‘on va firibgarlik usullaridan foydalanib, Ruanda haqida asossiz dushmanlik fikrini shakllantirmoqda”, deya xulosa qilgan diplomatik idora.
Kigali rahbariyati Belgiyaning 1994-yilda kamsitish, ta’qib va oxir-oqibat tutsi xalqiga qarshi genotsidga olib kelgan etnik ekstremizmni avj oldirishda halokatli tarixiy rol o‘ynaganini eslatib o‘tgan.
2025-yil boshidan beri “23-mart harakati” (M23) qo‘zg‘olonchilari KDR sharqida hujumlarni boshlagan. Ular Shimoliy va Janubiy Kivu viloyatlarining katta qismini, jumladan ularning ma’muriy markazlari Goma va Bukavuni bosib olgan. KDR hukumati Ruandani M23ni o‘z armiyasining muntazam bo‘linmalari bilan qo‘llab-quvvatlashda ayblayapti. Kigali esa bu ayblovlarni rad etgan.
Izoh (0)