Toshkent shahrining Yangihayot tumanidagi zavodlardan birida 6-mart kuni bojxona organlari tomonidan noqonuniy muomaladan olib qo‘yilgan 132 180 quti tamaki mahsulotlari yo‘q qilindi.
Qog‘oz quti va o‘ramlar tarozida tortilib, qayta ishlash uchun tadbirkorlarga topshiriladi. Atrof-muhit va inson salomatligiga zarar yetkazmaslik hamda chiqindilardan oqilona foydalanish maqsadida bu galgi yo‘q qilish jarayonida yangi yondashuv qo‘llandi. Noqonuniy muomaladan olib qo‘yilgan tamaki mahsulotlari sud qaroriga ko‘ra yo‘q qilinishidan oldin qog‘oz o‘rovlaridan ajratildi. Maxsus pechlarda faqat sigaret donalari hamda poliyetelin yoqildi. Bu jarayonda jurnalistlar, blogerlar hamda Bojxona instituti kursantlari bevosita ishtirok etdi.
So‘nggi yillarda bojxona organlari tomonidan noqonuniy tamaki mahsulotlarini ochiq tarzda yo‘q qilish an’anaga aylandi. Bunday choralar jamiyat tomonidan ijobiy baholanib, qonunbuzarliklarning oldini olishda samarali natijalar bermoqda. 2024-yilda O‘zbekistonda tamaki mahsulotlarining noqonuniy aylanmasi hajmi 19,4 foizdan 9,6 foizgacha kamaygan.
Yo‘q qilingan mahsulotlarning aksariyati Toshkent aeroportida qo‘lga olingan. Noqonuniy yo‘llar bilan olib kelingan ushbu tamaki mahsulotlarining umumiy qiymati 1 milliard so‘mni tashkil etadi.
Ushbu galereyada tadbir davomida olingan suratlarni tomosha qilishingiz mumkin.
Izoh (0)