“Amerikadagi oʻzbekistonliklarda ham topilgan pulni keraksiz narsaga ayamay sarflash odati bor” — Navbahor Imomova toʻy qilish madaniyati haqida gapirdi

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 17-soni mavzusi “Amerikada Oʻzbekiston ovozi” bo‘lib, dastur mehmoni sifatida “Amerika ovozi” jurnalisti Navbahor Imomova taklif etildi.

— Inson kim boʻlishidan qatʼi nazar, bir mamlakatdan ikkinchisiga borar ekan, oʻz qadriyatlari bilan birga illatlarini ham olib boradi. Shunday illatlar borki, ularni razillik, uyat, notoʻgʻri, deymiz. Lekin yana shunday illatlar bor, masalan, dasturxonga haddan ortiq koʻp ovqat tortish, juda ortiqcha mehmondorchilik qilib yuborish yoki vaqtni qadrlamaslik, boshqalarning vaqti, rejasi ustidan qarorlar qilish kabilar amerikaliklarga yoqmaydi. Men siz bilan maslahatlashmasdan nimanidir belgilamayman. 

Misol uchun, amerikalik juftlik toʻyini rejalashtirayotgan boʻlsa, avvalo, oʻzi tanlagan 15–20 nafar mehmonga xabar beradi. “Toʻyimizni kelasi yil mart oyida Gavayida oʻtkazishni rejalayapmiz, kela olasizmi? Oldindan shu kunni kalendaringizga belgilay olasizmi?” — deb soʻrashadi. Ha yoki yoʻq desam ham, aniq borish-bormasligimga kafolat berolmayman. Lekin bu ular uchun muhim, chunki siz tanlangan 15 nafar eksklyuziv mehmondan birisiz, borolmasangiz, oʻrningizga boshqasi tanlanadi. Bu sizning ishonchingizga, oʻzaro izzat-hurmatga asoslangan kelishuv hisoblanadi. 

Oʻzbekistonliklarning toʻylari esa bunday emas, har ikki haftada bir toʻy, kelishingiz kerak. Buni illat demoqchi emasman-ku, maslahatlashmay qilinadigan ish deyish mumkin. Odamlar bu mening toʻyim, shaxsiy ishim, bilganimni qilaman, deb aytishi mumkin. 

Oʻzbek boʻlmagan amerikaliklarning toʻylari ham qimmat. Masalan, yaxshi toʻy qilaman desangiz, Qoʻshma Shtatlarda ham 50–60 minggacha (AQSH dollari — tahr.) sarflashingiz mumkin. Shunday boʻlishiga qaramay, pulni asosan, oʻzingizga, asal oyiga, chiroyli koshona, kurort yoki sohil boʻyida toʻy qilsangiz, joyning oʻziga, kiyimlar, tort, bezaklarga sarflaysiz. Bular baribir oʻzingizda qoladi. 

Amerikadagi oʻzbekistonliklarda esa boshqacha holat: topilmagan pulni ayamaslik, keraksiz narsalarga sarflash odati ularda ham bor. Lekin Amerikada undan ham muhimroq muammo — kelin yoki kuyov topish. Oʻzbeklar baribir kelinim, kuyovim oʻzimdan boʻlsin, deydi. Buni yoshi oʻtgan sari odamlar yaxshiroq tushunadi, millatim nasli davom etsin, ona tilimni biladigan inson bilan turmush quray, degan xohish bor. Bu hamma millat vakillariga xos oʻy-fikrlar, — deydi Navbahor Imomova.