O‘zbekiston fuqarolari Slovakiyaga doimiy ishga taklif qilinmoqda. Bu haqda Migratsiya agentligi xabar berdi.
Qayd etilishicha, 18–45 yosh orasidagi erkak talabgorlarga Markaziy Yevropadagi mamlakat avtomobil zavodlarida kara haydovchilik (pogruzchik) bo‘yicha ish o‘rinlari mavjud.
“Jami 150 ta ish o‘rni bor. Oylik 950 yevro (1026 dollar), ish hajmiga qarab turli bonuslar ham beriladi. Haftada 5 kun ish, (3 ta smena). Xodimdan tibbiy sug‘urta qilinadi”, deya xabar bergan agentlik.
Ishchi karada turli hajmdagi avtomobil ehtiyot qismlarini tashish va yuklash kerak bo‘ladi. Sinov muddati birinchi uch oyni (oylik saqlangan holda) tashkil etadi.
Nomzoddan quyidagilar talab etiladi:
- rus tilini yozma va og‘zaki bilish;
- “B” toifadagi haydovchilik guvohnomasiga ega bo‘lish va avtokarada ishlash bo‘yicha kamida 6 oylik tajriba;
- O‘zbekiston yoki Shengen hududida sudlanmaganlik;
- ikki bosqichli (nazariy va amaliy) imtihonlardan muvaffaqiyatli o‘tish.
Ishchi viza, ketishdan oldingi o‘quv kurslari hamda Slovakiyaga borish xarajatlari nomzod tomonidan qoplanadi. Agentlikka ko‘ra, dastlabki saralashdan o‘tgan fuqarolar yo‘l harakati qoidalari bo‘yicha test hamda karada amaliy mashqlarni bajaradi. Hozirgacha mazkur yo‘nalishdagi ish o‘rinlari uchun 62 nafar nomzod qiziqish bildirgan.
Ma’lumot uchun, Slovakiyaning doimiy aholisi soni 5,5 million kishidan iborat. 2024-yilda mamlakat yalpi ichki mahsuloti 132,9 milliard dollarni tashkil etgan. Bu miqdor aholi jon boshiga qariyb 24 163 dollardan to‘g‘ri keladi.
Taqqoslash uchun, ayni paytda O‘zbekiston aholisi 37,5 million nafardan ortgan. 2024-yilda respublika yalpi ichki mahsuloti hajmi 115 milliard dollarni tashkil etgan. Bu aholi jon boshiga 3063 dollar degani.
2024-yilda O‘zbekistonga xorijiy davlatlardagi mehnat muhojirlari 14,8 milliard dollar pul yuborgan. Bu 2023-yildagidan 3,4 milliard dollarga ko‘p. Mablag‘larning 77 foizi Rossiyadan (11,5 milliard dollar) kelib tushgan. Shu bilan birga, Qozog‘istondan 795 million dollar, AQSHdan 577 million dollar, Janubiy Koreyadan 534 million dollar, Turkiyadan 405 million dollar, Buyuk Britaniyadan 135 million dollar o‘tkazilgan.
Izoh (0)