“Yo‘l harakati xavfsizligi tizimi takomillashtirilishi munosabati bilan O‘zbekiston Respublikasining Jinoyat, Jinoyat-protsessual kodekslariga hamda O‘zbekiston Respublikasining Ma’muriy javobgarlik to‘g‘risidagi kodeksiga qo‘shimcha va o‘zgartirishlar kiritish haqida”gi qonun 20-fevral kuni qabul qilindi.
Jinoyat kodeksiga kiritilgan qo‘shimchalarga ko‘ra, transport vositasini mastlik holatida boshqarganlik yoki tekshiruvdan o‘tishdan bo‘yin tovlaganlik uchun jinoiy javobgarlik belgilandi.
Shuningdek, quyidagilar uchun jinoiy javobgarlik joriy etildi:
- avtomototransport vositalarining va ular tirkamalarining (yarim tirkamalarining) davlat raqam belgilarini yoki identifikatsiya raqamlarini qonunga xilof ravishda tayyorlaganlik, o‘tkazganlik yoki ulardan foydalanganlik, shuningdek, ularni qalbakilashtirganlik uchun;
- avtomototransport vositalari, shahar elektr transporti vositalari haydovchilarini va traktorchi-mashinistlarni tayyorlash hamda qayta tayyorlash, shuningdek, imtihonlar o‘tkazish va guvohnomalar berish tartibini buzganlik uchun;
- transport vositalarini boshqarish huquqidan mahrum etilgan shaxsning transport vositasini boshqarganlik uchun;
- siqilgan tabiiy gazda, suyultirilgan neft gazida yoki dizel va gazsimon yoqilg‘i aralashmasida ishlaydigan transport vositalaridan foydalanishda xavfsizlik qoidalarini buzganlik uchun.
Qonun rasmiy e’lon qilingan kundan e’tiboran kuchga kirdi.
Mazkur qonun Qonunchilik palatasining 2024-yil 28-noyabrdagi majlisida uch o‘qishda ko‘rib chiqib, qabul qilingandi. Senatning 24-yanvardagi majlisida ma’qullangandi. 2024-yil 16-avgustda o‘tgan 55-yalpi majlisida ham ko‘rilgan edi. Majlisda senator Qutbiddin Burxonov O‘zbekistonda 2024-yilda 9364 ta yo‘l-transport hodisalari sodir bo‘lganini, buning oqibatida 2203 kishi vafot etgan, 8901 nafari tan jarohati olganini ma’lum qilgandi.
Izoh (0)