Dubay politsiyasi ilk bor faqat ayollardan iborat 16 kishilik qutqaruv guruhini tuzdi. Bu haqda Gulf News xabar berdi.
Ular Transport va qutqaruv departamentida ishlaydi. Bu Arab Amirliklari va Yaqin Sharqdagi to‘liq ayollardan iborat birinchi qutqaruv otryadi hisoblanadi. Guruh favqulodda vaziyatlarda ayollar va bolalarning ehtiyojlarini qondirish uchun tuzilgan. Jamoa yo‘l-transport hodisalari, yong‘inlar, qidiruv-qutqaruv ishlarini bartaraf etish va jabrlangan ayollarga hissiy yordam ko‘rsatish bo‘yicha o‘qitilgan.
Guruhga qo‘shilishdan oldin qizlar 6 oy davomida politsiya akademiyasida harbiy va qutqaruv mashg‘ulotlari, jismoniy tayyorgarlik va maxsus qutqaruv usullarini o‘rgangan. Ular o‘qishni 2024-yil sentyabr oyida tamomlagan.
Tayyorgarlik arqon yordamida tog‘ga chiqish va tushish, patrul mashinasi bilan jihozlangan maxsus uskunalar bilan ishlash ko‘nikmalarini o‘z ichiga olgan. Barcha ayollar haydovchilik guvohnomasiga ega. Ular favqulodda holatlarga 7 daqiqadan kam vaqt ichida javob berishni maqsad qilgan.
Ayollar yong‘in, qulflangan eshiklar, nosoz liftlar, qidiruv-qutqaruv ishlari va falokatlar bo‘yicha chaqiruvlarga ham javob beradi.
Izoh (0)