Shvetsiya poytaxti Stokgolmda eronlik ayol Qur’onni yoqib yubordi. Bu haqda Anadolu xabar berdi.
Ma’lum qilinishicha, eronlik 47 yoshli Marjon Bayrami muqaddas kitobni yoqib yuborish uchun politsiyadan ruxsat olgan. U huquq-tartibot idoralari xodimlari himoyasida Malaren ko‘li qirg‘og‘ida mangalda Qur’onni yoqib yuborgan. Ayol “barcha dinlarni yo‘q qilish” kerakligini aytgan.
Qur’onning yoqib yuborilishiga oid so‘nggi ma’lumotlar
Yanvar oyida Stokgolmdagi Turkiya elchixonasi oldida Qur‘on yoqib yuborilgandi. Aksiyani ultrao‘ng va islomga qarshi “Qattiq kurs” partiyasining daniyalik-shved faoli Rasmus Paludan boshqargan.
Aprel oyida Shvetsiya maʼmuriy sudi mamlakat Tashqi ishlar vazirligi tomonidan Qurʼon yoqib yuborilgan namoyishlarga qo‘yilgan taqiqni bekor qilgan. Sud o‘z qarorida yig‘ilishlar va namoyishlar o‘tkazish erkinligi konstitutsiyaviy himoyalangan huquqlar ekanini keltirgan.
Iyun oyida iroqlik muhojir Stokgolmdagi bosh masjid yonida Qur’onni yoqib yuborgandi.
20-iyul kuni Shvetsiya politsiyasi Stokgolmdagi Iroq elchixonasi oldida Qur‘on va Iroq bayrog‘i yoqib yuborilgan norozilik namoyishini o‘tkazishga ruxsat berdi.
Shundan so‘ng yuzlab odamlar Shvetsiyaning Bag‘doddagi elchixonasiga bostirib kirib, binoga o‘t qo‘ygan. Namoyishchilarni tarqatish uchun Iroq politsiyasi suv purkagichlardan foydalangan.
O‘z navbatida, Iroq mamlakatdan Shvetsiya elchisini haydagan va ya’na muqaddas kitob yoqib yuborilsa, diplomatik aloqalarni uzishini bildirgan.
Shundan so‘ng, Iroqning Daniyadagi elchixonasi oldida Qur’on yoqib yuborilgan. Namoyishchilar buni Shvetsiyaning Bag‘doddagi elchixonasiga yaqinda uyushtirilgan hujumga norozilik sifatida amalga oshirganini aytgan.
Yevropa Ittifoqi tashqi siyosat xizmati rahbari Josep Borrel bunday harakatlarni qoralagan. U bu holat Yevropadagi ko‘plab musulmonlarni ranjitganini aytgan.
Borrel Qur’on yoki boshqa muqaddas deb hisoblangan boshqa kitoblarni tahqirlash haqoratli, hurmatsizlik va ochiq provokatsiya sifatida baholanishini ta’kidlagan.
Izoh (0)