Olimlar ko‘rish qobiliyatini tiklash uchun vaksina ishlab chiqdi

Kolorado universiteti tibbiyot instituti tadqiqotchilari ko‘rish qobiliyatini tiklashga yordam beruvchi LL-341070 preparatini ishlab chiqdi. Bu haqda Medical Express xabar berdi.

Preparat tarqoq skleroz, jarohatlar yoki nevrologik kasalliklardan so‘ng ko‘rish qobiliyatini yo‘qotganlarga yordam berishi kutilmoqda. U asab tolalarining himoya qobig‘i bo‘lgan miyelinning tiklanishini tezlashtiradi, shu bilan birga miyaning tabiiy tiklanish jarayonini jarrohliksiz rag‘batlantiradi.

Sichqonlar ustida o‘tkazilgan sinovlar muvaffaqiyatli yakunlangan. Agar AQSH Sog‘liqni saqlash vazirligi ruxsat bersa, insonlar ustidagi sinovlar 2025-yilning o‘zida boshlanishi mumkin.

“Miyelin miya faoliyatida muhim ahamiyatga ega ekanini ko‘p yillardan buyon bilamiz. Ushbu tadqiqot kortikal (qobig‘) miyelinning ko‘rish qobiliyatidagi rolini alohida ta’kidlaydi. Dori vositasi o‘ta muhim ahamiyatga ega bo‘lishi mumkin, chunki u miyaning tabiiy tiklanish jarayonlarini tezlashtiradi”, deydi tadqiqotning birinchi rahbari, professor Daniel Denman.

Tadqiqotchilar dori vositasini miyaning boshqa qismlarida sinab ko‘rishni va davolash usulini takomillashtirish orqali uni yanada samaraliroq hamda vaqti kelib bemorlar uchun qulayroq qilishni rejalashtirmoqda.

“Ushbu tadqiqot bizni miya o‘z-o‘zini davolash qobiliyatiga ega bo‘lgan dunyoga yaqinlashtiradi.Undan foydalangan holda, odamlarga ko‘rish qobiliyati va kognitiv funksiyasini tiklash imkoniyatini taqdim etadi. Bu kashfiyot shunchaki boshlanish. Biz LL-341070 va shunga o‘xshash davolash usullari kelajakda miyaning umumiy faoliyatini va hayot sifatini yaxshilash orqali bemorlarga haqiqiy, sezilarli naf keltirishi mumkinligiga umid qilamiz”, deya xulosa qildi tadqiqot rahbarlaridan Ethan Hughes.

Olimlar ko‘rish qobiliyatini tiklash uchun vaksina ishlab chiqdi

Izoh (0)

Mavzuga doir

Daryo.uz | Sizning muammoingiz yechimi