“Afsuski, ko‘p odamlar shifokorga kech murojaat qiladi” — oftalmolog O‘zbekistonda keng tarqalgan ko‘z kasalliklari haqida

O‘zbekistonda miopiya, glaukoma va qandli diabet taʼsirida kelib chiqadigan ko‘z kasalliklari ko‘p uchraydi. Bu haqda ko‘z shifokori Zulfiya Maqsudova “Daryo” muxbiri bilan suhbatda maʼlum qildi.

24-may kuni Toshkent shahrida “Oftalmologiyada innovatsion texnologiyalar” mavzusida xalqaro konferensiya bo‘lib o‘tdi. Anjuman Sog‘liqni saqlash vazirligi, Oftalmologlar assotsiatsiyasi va Shifokorlar assotsiatsiyasi hamkorligida tashkil etildi. Muloqotda ko‘z kasalliklarini davolashda foydalanilayotgan yangi texnologiyalar va sohani rivojlantirishdagi qator masalalar muhokama qilindi. Tadbir doirasida Oftalmologlar assotsiatsiyasi raisi, ko‘z shifokori Zulfiya Maqsudova “Daryo” muxbiriga intervyu berdi.

Zulfiya Maqsudovaning aytishicha, bugun O‘zbekistonda bir nechta ko‘z kasalliklari keng tarqalgan.

“Respublikada eng ko‘p uchraydigan ko‘z kasalligi – miopiya (uzoqni ko‘ra olmaslik). Ayniqsa, bolalar orasida uzoqni ko‘ra olmaslik kasalligi kundan kun ko‘payib bormoqda. Oldin ularda bu kasallik 6-7 yoshlardan boshlab kuzatilgan bo‘lsa, hozir ancha erta uchramoqda. Chunki bolalarimiz qo‘liga telefonlar, gadjetlarni erta beryapmiz. Shuning uchun 3-4 yoshdan ham miopiya boshlanyapti. Keyingi keng tarqalgan ko‘z kasalligi – glaukoma, yaʼni ko‘z ichidagi bosim. Bu ko‘rlikka olib boradigan kasallikdir. Uning shunaqa formalari borki, hech qanday og‘riqsiz, asta-sekin ko‘r bo‘lib qolish mumkin. Shuning uchun ham bemorlar 40 yoshga borganda, albatta har yili shifokorga o‘z vaqtida ko‘z bosimini o‘lchatib, tekshiruvdan o‘tkazib turishlari kerak. Agar kasallik ertaroq aniqlansa, ko‘rish qobiliyatini saqlab qolish mumkin. Afsuski, juda ko‘p odamlar kech, yaʼni kasallik uch yoki to‘rtinchi bosqichga o‘tgandan keyin murojaat qiladi”, — dedi mutaxassis.

Zulfiya Maqsudovaning qo‘shimcha qilishicha, mamlakat aholisida qandli diabet kasalligi ham juda ko‘p uchraydi. Uning ko‘zga bo‘lgan salbiy taʼsiri jiddiy oqibatlarga olib kelishi mumkin.

“Qandli diabet birinchi navbatda ko‘z tubidagi mayda qon tomirlarni ishdan chiqaradi. Shuning uchun har bir diabet bo‘lgan bemor faqatgina endokrinolog emas, balki oftalmolog kuzatuvida ham bo‘lishi kerak. Chunki mayda qon tomirlar yoki yangi o‘sib chiqqan qon tomirlar yorilib, ko‘z tubiga qon quyilishi oqibatida ko‘rish qobiliyati yo‘qolishi mumkin. Vaqtida o‘sgan, keraksiz qon tomirlarni lazerlar bilan kuydirib, qon quyilishini oldini olib turish lozim. O‘zbekistonga yangi navigatsion lazerlar kirib keldi. Ular sunʼiy ong bilan ishlab, butun ko‘z tubini bir necha soniyalarda lazer qila oladi. Avval bunday tekshiruvga yarim soatdan 40 daqiqagacha vaqt ketardi. Qandli diabetga chalingan bemorlar buncha vaqt bir nuqtaga qarab turishi qiyin. Hozir yangi uskunalar yordami sabab bemor ko‘rigi ancha osonlashgan”, — dedi shifokor.

Maʼlumot uchun, anjumanda O‘zbekistonda faoliyat yuritayotgan davlat va xususiy klinikalar mutaxassislari, AQSH, Buyuk Britaniya, Italiya, Ispaniya, Shveysariya, Rossiya, Qozog‘iston va Turkmanistondan kelgan yetakchi oftalmologlar ishtirok etdi. Muloqot jarayonida oftalmologik yordamni tashkil etish masalalari, glaukoma, ko‘zning oldingi segmenti, ko‘z gavhari va orqa segment patologiyasini davolashda yangi texnologiyalar, oftalmologik diagnostikada innovatsion yechimlar va boshqa masalalar muhokama qilindi.