Futbol bo‘yicha Angliya chempionatining 23-tur, markaziy bahsi “Manchester Siti” — “Chelsi” (3:1) o‘yinidan keyin mashhur rossiyalik jurnalist Igor Rabiner post qoldirdi.
Rabiner Husanovga yaqin bo‘lgan inson bilan gaplashganini taʼkidlagan.
“Hammasi joyida, jamoada barcha qo‘llab-quvvatlagan, xususan Grilish alohida yoniga kelgan. Golga sabab bo‘lgan xato esa xayajondan emas, hatto “Lans”dagi debyutda xayajon ko‘proq bo‘lganini aytdi. Ko‘proq sabab, o‘yin tonusi bilan bog‘liq. U “Lans”dagi so‘nggi o‘yinini axir 22-dekabrda “PSJ” bilan bir oy oldin o‘tkazgandi. Shundan so‘ng “Siti” bilan muzokaralar boshlandi, natija jarohatdan saqlash maqsadida klub uni nafaqat o‘yinlar, balki umumiy guruh mashg‘ulotlaridan ham chetlatdi. Katta pul masalasi”, – deb yozadi jurnalist.
Igorga ko‘ra, Husanov Manchesterga kelgach esa ikki marta mashg‘ulot o‘tkazdi va birdaniga “Chelsi” bilan o‘yinga tushdi.
“Shu holatdayam Pep ishongani qiziq, demak u mashg‘ulotlarda nimadir ko‘rsata olgan. Husanov inglizchani tushunadi, faqat gapira olmaydi. Fransuzchada so‘zlasha oladi.
O‘yindagi ilk harakatlar normal bo‘ldi, oldinga yaxshi pas amalga oshirdi. Balkim shundan so‘ng diqqatini yo‘qotib qo‘ydi, o‘sha o‘yin va mashg‘ulotlardan uzoq bo‘lgani uchun tonus yetishmadi. Ammo keyin o‘ziga keldi, jamoa g‘alaba qozondi - demak ayni damda u normal ruhiy holatda.
Abduqodirga omad!”, – deya qo‘shimcha qilgan Rabiner.
Avvalroq Pep Gvardioladan Abduqodir Husanovning ilk uchrashuvi va xatosi haqida gapirgandi.
“U ingliz tilida gapirmaydi, shuning uchun biz Abduqodir bilan hali to‘g‘ridan-to‘g‘ri muloqot qilolmayapmiz. Unda hammasi joyida bo‘ladi. U hali faqat bitta yoki ikkita mashg‘ulotda qatnashdi. Men Chempionlar Ligasidagi muhim o‘yinni inobatga olgan holda, Jon Stounzni jarohatidan keyin maydonga tushirishga shoshiltirishni istamagandim. U o‘yindagi holatdan xulosa qiladi”, degan edi “Manchester Siti” bosh murabbiyi.
Ma’lumot uchun, “shaharliklar” o‘zbekistonlik himoyachining xatosidan so‘ng to‘p o‘tkazib yubordi. Abduqodir Husanov dastlabki 5 daqiqada bosim sabab o‘yinga moslashib keta olmadi. Keyinchalik bexato harakat qildi.
Uchrashuvda Gvardiola shogirdlari 3:1 hisobida g‘alaba qozondi. Husanov 54 daqiqa maydonda harakat qildi.
Izoh (0)