“Manchester Siti” klubining futbol bo‘limi direktori Chiki Bergistayn O‘zbekiston terma jamoasi va “shaharliklar”ning yangi himoyachisi haqida fikr bildirdi.
“Shaharliklar” direktori futbolchining ulkan salohiyatga ega ekanini ta’kidlab, Etihadga ko‘chib o‘tayotganidan xursand ekanini bildirdi.
“Biz uni saflarimizga qo‘shilganidan juda mamnunmiz va uning jamoaga hissa qo‘shishini sabrsizlik bilan kutmoqdamiz. Yosh bo‘lishiga qaramay, Abduqodir juda aqlli futbolchi. U kuchli, agressiv va nihoyatda tezkor.
Pep bilan ishlash uni yanada kuchliroq qiladi. U bilan gaplashib, doimo o‘z ustida ishlashga qat’iy qaror qilganini angladim. Uning kelishi Yevropadagi eng yaxshi jamoalardan biri sifatida o‘z mavqeyimizni mustahkamlash uchun ajoyib imkoniyatdir.
“Manchester Siti” klubidagi barcha Abduqodirni jamoada qarshi olishdan mamnun”, dedi Chiki Bergistayn.
“Manchester Siti” klubi o‘zbekistonlik himoyachi Abduqodir Husanov 4,5 yilga mo‘ljallangan shartnoma imzoladi. Abduqodir o‘ziga 45-raqamni tanlagan.
Shu tariqa Abduqodir Husanov Angliya Premyer Ligasida o‘ynaydigan birinchi o‘zbek futbolchisiga aylanadi. Angliyaning yuqori divizionida futbolchilari o‘ynagan davlatlar soni esa 119 taga yetadi.
Ma’lumot uchun, “Lans” Husanovni 2023-yil iyul oyida “Energetik-BGU”dan 100 ming yevroga sotib olgandi. Husanov Fransiya klubi safida 31 ta o‘yinda maydonga tushib, bir marta golli uzatma amalga oshirdi.
Izoh (0)