AQSHning Nyu York shahrida haydovchilar tig‘iz soatlarda markaziy yo‘llardan harakatlanish uchun pul to‘laydi. Bu haqda Financial Times xabar berdi.
Ma’lum qilinishicha, dastur 5-yanvar kuni ishga tushirilgan. “Tirbandlik uchun to‘lov” aholi zich yashaydigan shaharda transport tirbandliklarini kamaytirishga qaratilgan. Ish kunlari Manhettenning eng gavjum hududlariga kirish narxi 9 dollargacha baholanishi mumkin. Ish vaqtidan tashqari ko‘pchilik transport vositalari uchun yo‘llardan foydalanish narxi 2,25 dollarni tashkil etadi.
Kichik yuk mashinalari haydovchilari tig‘iz vaqtda 14,40 dollar, kattaroq yuk mashinalar esa 21,60 dollar to‘laydi. Ushbu tizim shahar markaziga kiradigan avtomobillar sonini taxminan 10 foizga kamaytirishi, Nyu Yorkda jamoat transportini rivojlantirish uchun 15 milliard dollar yig‘ishga yordam berishi kutilmoqda.
Shahar transport boshqarmasi raisi va bosh direktori Yanno Liberning aytishicha, reja besh yil davomida ishlab chiqilgan. Nyu Jersi shtati advokatlari yo‘l haqi tarifini joriy etilishining oldini olish maqsadida sudga taqiq uchun ariza topshirgan, biroq muhokamadan so‘ng sudya uni rad etgan.
Joriy etilgan yo‘l haqi to‘lovi tizimining istiqboli noaniq bo‘lib qolmoqda. Respublikachilar saylangan prezident Donald Trampni dasturga berilgan federal ruxsatnomani bekor qilishga da’vat etmoqda.
Izoh (0)