Avval xabar berilganidek, 3-yanvar kuni Toshkent shahrida metan zapravkada gaz yetmayotgani sabab masʼullarni tanqid qilgan va 15 sutkaga qamalgan G‘ayrat Do‘stovning appelyatsiya sudi bo‘lib o‘tmoqda. “Daryo” muxbiri xabariga ko‘ra, sud qisqa tanaffusdan so‘ng ishini davom ettiryapti.
Sud majlisida chiqish qilgan advokat Bahrom Ermatov tanqidni mayda bezorilik deb atash xatoligini taʼkidlagan.
“Birinchi instansiya sudi Maʼmuriy javobgarlik to‘g‘risidagi kodeksning 2 va 3-moddalari talablarini qo‘pol ravishda buzgan. Himoyam ostidagi G‘ayrat Do‘stov tomonidan mayda bezorilik sodir etilmagan. U zapravkada 6–8 soatlab turib, ayni navbati kelganda gaz berish to‘xtatilgani sabab kuchli ehtiros bilan hayajonlanib gapirgan. Prezidentning aholini gaz bilan taʼminlash bo‘yicha topshiriqlarini bajarmayotgan masʼullarnigina tanqid qilgan. Shuning uchun biz tanqidni mayda bezorilik deb aytishimiz mumkin emas. Maʼmuriy javobgarlik to‘g‘risidagi ishni tugatishni so‘rayman”, dedi advokat.
Avvalroq G‘ayrat Do‘stovni sudda 12 nafar advokat himoya qilayotgani, jarayonda sudlanuvchining tobi qochgani maʼlum bo‘lgandi. U sud majlisidagi tanaffus paytida yaqinlari va advokatlari bilan suhbatlashib, boshiga qop kiydirishgani va yerto‘lada saqlashganini aytgan.
“Nima bo‘lganda ham vatanga xiyonat qilmadim, xiyonatchi emasman”, deya bir necha marta takrorlagan sudlanuvchi.
Eslatib o‘tamiz, avvalgi sud hukmida G‘ayrat Do‘stov 2024-yil 23-dekabr kuni Toshkent shahar Bektemir tumanida joylashgan zapravkada shoxobcha xodimlarini haqoratlab, jamoat tartibini buzgani va mayda bezorilik sodir etgan yozilgan.
Sudlanuvchi 26-dekabr kuni Maʼmuriy javobgarlik to‘g‘risidagi kodeksning 183-moddasi (mayda bezorilik)da nazarda tutilgan huquqbuzarlikni sodir etgan deb topilgan va 15 sutkaga qamalgan.
Izoh (0)