Metan zapravkada gaz yetmayotgani uchun eʼtiroz bildirib, masʼullarni tanqid qilgan G‘ayrat Do‘stov sud hukmi bilan 15 sutkaga qamalgandi. “Daryo” muxbirining xabar qilishicha, fuqaro va uning advokatlari tomonidan keltirilgan apellyatsiya shikoyatlariga asosan unga oid maʼmuriy huquqbuzarlik to‘g‘risidagi ish bugun, 3-yanvar kuni ko‘rib chiqilmoqda.
Xabarga ko‘ra, G‘ayrat Do‘stovni sudda 12 nafar advokat himoya qilmoqda. Sudlanuvchi advokat so‘roviga javoban sudga Toshkent shahar IIBBdan olib kelinayotganini aytgan.
Appelyatsiya sudi jarayonida G‘ayrat Do‘stovning tobi qochgan.
“Unga yordam ko‘rsatilmoqda va sud qisqa tanaffus eʼlon qildi”, deyiladi muxbir xabarida.
G‘ayrat Do‘stov sud majlisida yaqinlari va advokatlarining savollariga javob berar ekan, boshiga qop kiydirishganini, yerto‘lada saqlashganini aytgan.
“Nima bo‘lganda ham, Vatanga xiyonat qilmadim, xiyonatchi emasman”, deya bir necha marta takrorlagan sudlanuvchi. Hozircha u nega bunday degani nomaʼlum. Sud davom etmoqda.
Eslatib o‘tamiz, avvalgi sud hukmida G‘ayrat Do‘stov 2024-yil 23-dekabr kuni Toshkent shahar Bektemir tumanida joylashgan zapravkada shoxobcha xodimlarini turli so‘zlar bilan haqoratlab, jamoat tartibini buzib, mayda bezorilik qilgani yozilgan.
Jinoyat ishlari bo‘yicha Bektemir tuman sudi raisi D.A.Dadaxanovaning 26-dekabrdagi qarori bilan G‘.Do‘stov Ma’muriy javobgarlik to‘g‘risidagi kodeksning 183-moddasi (mayda bezorilik)da nazarda tutilgan huquqbuzarlikni sodir etgan deb topilgan va 15 sutka maʼmuriy qamoq jazosi tayinlangan. Shuningdek, undan Toshkent shahar IIBB Maʼmuriy tartibda qamoqqa olingan shaxslarni saqlash maxsus qamoqxonasi foydasiga qamalganlarni saqlash bilan bog‘liq bo‘lgan xarajatlar uchun maʼmuriy qamoqning har bir sutkasi uchun bazaviy hisoblash miqdorining 15 foizi miqdorida, jami 843 ming 750 so‘m undirish belgilangan.
Izoh (0)