Rapid bo‘yicha Jahon chempionatidan chetlatilgan Karlsen blitsda ishtirok etadigan bo‘ldi

34 yoshli norvegiyalik shaxmat ustasi, 16-jahon chempioni Magnus Karlsen blits bo‘yicha Jahon Chempionatida ishtirok etishini ma’lum qildi.

Avvalroq shaxmatchi Nyu-Yorkda bo‘lib o‘tgan 2024-yilgi rapid bo‘yicha Jahon Chempionatida kiyinish qoidalariga rioya qilmagani sababli diskvalifikatsiya qilingan edi.

Sportchi o‘sha paytda tashkilotga nisbatan boykot e’lon qilib blits bo‘yicha jahon chempionatida ishtirok etishdan ham voz kechgandi.

Magnus FIDE prezidenti Arkadiy Dvorkovich va musobaqa bosh homiysi Timur Turlov bilan suhbatdan keyin fikrini o‘zgartirgan.

“Men o‘z intervyumda FIDE haqida keskin gaplar aytdim. Tashkilot emas, balki ba’zi shaxslarga murojaat qilgandim. Bu muammoni men emas, ular keltirib chiqarishdi deb o‘ylayman. Men hatto Nyu Yorkni tark etish uchun chipta ham olgandim. Ammo otam FIDE prezidenti bilan gaplashib ko‘rishim kerakligini aytdi. Dvorkovich bilan munosabatlarimiz hamisha yaxshi bo‘lgan. Nyu-Yorkda yana bir kun o‘ynayman. Agar hammasi yaxshi ketsa, keyingi kuni ham qatnashaman”, dedi Karlsen “Take Take Take” podkastida.

Ma’lumot uchun, rapid yo‘nalishida 18 yoshli Volodar Murzin (2588) eng tajribali raqiblarini ortda qoldirib, jahon chempioniga aylandi. Javohir Sindorov 6-o‘rinni egalladi. Nodirbek Abdusattorov kuchli 30 likdan o‘rin oldi.