Lego va Hasbro kompaniyalari “Transformerlar” filmidagi Saundveyv (Soundwave) nomli deseptikonga bag‘ishlangan yangi konstruktor to‘plamini namoyish etdi. Bu lego to‘plami afsonaviy franshiza asosida yaratilgan va ovoz moduli bilan jihozlangan birinchi konstruktor bo‘lib, bugungi kunda eng qimmat “Transformerlar” lego to‘plami hisoblanadi.
Model 1 505 ta detallardan iborat bo‘lib, yig‘ilgn holatda taxminan 33 santimetr balandlikka ega bo‘ladi. Sharnirli bo‘g‘inlar tufayli deseptikon to‘liq harakatlana oladi.
Konstruksiya klassik “Transformerlar” uslubida ishlab chiqilgan: robot holatidan kasseta pleyer ko‘rinishiga osongina o‘tadi — buning uchun uni alohida qismlarga ajratishga hojat yo‘q. To‘plam tarkibiga 1980-yillardagi original Hasbro Soundwave figuralariga ishora sifatida raketa kapsulasi va lazerli qurol kabi aksessuarlar ham kiritilgan. Ular pleyer batareyasi ko‘rinishiga keladigan tarzda o‘zgaradi.
Ushbu konstruktor ikkita asosiy jihati bilan ajralib turadi. Birinchisi ovoz moduli bo‘lib, u Saundveyvning mashhur iboralari va 1980-yillardagi multfilm musiqasidan parchalarni ijro etadi.
Ikkinchi noyob jihati qo‘shimcha transformerlarning mavjudligidir. To‘plamga kichik o‘lchamdagi, yig‘iladigan Ravage va Laserbeak figuralari kiradi — ular kassetaga aylanishi mumkin.
Yangi konstruktor 1-avgustdan sotuvga chiqadi va uning narxi 190 dollarga baholanadi.
Izoh (0)