30-noyabr kuni Superliga 2024-yilgi mavsumning oxirgi 26-turi yakuniga yetdi. O‘zbekiston futbol hakamlari markazi mazkur uchrashuvlar tugagach, Ekspert-hakamlar komissiyasining navbatdagi yig‘ilishini o‘tkazdi. 

Yig‘ilishda tur doirasida kuzatilgan bahsli vaziyatlar tahlil qilindi. Bu bellashuvlarda jami 6 ta bahsli vaziyat yuzaga keldi. 

1-vaziyat. “Nasaf” - “Metallurg” to‘qnashuvi: mehmonlarning goli.

“Nasaf” - “Metallurg” uchrashuvining 6-daqiqasida mehmonlar gol urishga muvaffaq bo‘ldi. Biroq bosh hakam Nikita Mustafin bekobodliklar tomonidan fol qayd etilganini maʼlum qildi va golni inobatga olmadi.  

Ekspert-hakamlar komissiyasi qarori: Bu vaziyatda VAR holatga aralashmasdan to‘g‘ri qilgan. Gol urgan futbolchi maydon egalarining 7-raqamli vakiliga qo‘pollik ishlatdi. Ekspert-hakamlar komissiyasi tomonidan hakamning qarori to‘g‘ri, deb topildi.

2-vaziyat: “Nasaf” - “Metallurg” bellashuvi: bahsli vaziyat.

“Nasaf” - “Metallurg” uchrashuvining 32-daqiqasida bekobodliklarning 2-raqamli vakili mezbonlarning 70-raqamli aʼzosining oyog‘iga zarba berdi. Bosh hakam Nikita Mustafin dastlab futbolchiga qizil kartochka ko‘rsatdi, ammo monitor yoniga borib holatni o‘rgangach fol qayd etilmaganini maʼlum qildi.  

Ekspert-hakamlar komissiyasi qarori: Bu vaziyatda VAR epizodga aralashib to‘g‘ri qilgan. Futbolchi dastlab to‘pni tepgan, maydon egalari aʼzosi esa unga kelib to‘qnashgan. Bu vaziyatda qizil kartochka berish uchun asos yo‘q. Komissiya hakamlarning qarori to‘g‘ri ekanini maʼlum qiladi.  

3-vaziyat. “Nasaf” - “Metallurg” qarama-qarshiligi: bahsli penalti.

“Nasaf” - “Metallurg” uchrashuvining 45+7-daqiqasida mezbonlar jarima maydonida qarshiliklarning 7-raqamli futbolchisi qo‘liga tegib, o‘yinga qaytdi. Bosh hakam Nikita Mustafin monitor orqali vaziyatni ko‘rgach, mazkur epizodda to‘p qo‘lga tekkanini qayd etdi va nuqtaga ishora qildi.  

Ekspert-hakamlar komissiyasi qarori: Bu vaziyatda futbolchining qo‘li notabiiy turibdi. Himoyachining tana holati qo‘l yordamida kengaytirilgan. 11 metrlik jarima zarbasi uchun asos yetarli. Ekspert-hakamlar komissiyasi tomonidan hakamlarning qarori to‘g‘ri, deb hisoblandi.

4-vaziyat: “Lokomotiv” - “Neftchi” o‘yini: bahsli penalti.

“Lokomotiv” - “Neftchi” uchrashuvining 54-daqiqasida mehmonlarning 70-raqamli aʼzosi raqib jarima maydoniga yorib kirdi. Ayni shu paytda raqib himoyachisi unga qo‘pollik ishlatib, to‘xtatib qoldi. Bosh hakam G‘ayrat Jo‘rayev bu vaziyatda qoidabuzarlik borligini qayd etdi va nuqtaga ishora qildi.  

Ekspert-hakamlar komissiyasi qarori: Bu vaziyatda himoyachi to‘p uchun o‘ynamagan. U oyog‘i bilan raqibining muvozanat yo‘qotishiga sabab bo‘lgan. 11 metrlik jarima zarbasi uchun yetarli asos mavjud. Ekspert-hakamlar komissiyasi hakamning qarori to‘g‘ri ekanini maʼlum qiladi.

5-vaziyat. “Surxon” - “Olimpik” qarama-qarshiligi: bahsli qizil kartochka.

“Surxon” - “Olimpik” uchrashuvining 39-daqiqasida nominal mehmonlarning 19-raqamli futbolchisi termizliklarning 10-raqamli aʼzosiga nisbatan qo‘pol harakat qildi. Bosh hakam Asker Najafaliyev dastlab fol qayd etgan va o‘yinchiga sariq kartochka ko‘rsatdi. VAR hakami uni monitor yoniga chaqirgach esa referi qarorni qizil kartochkaga o‘zgartirdi.

Ekspert-hakamlar komissiyasi qarori: Bu vaziyatda VAR holatga to‘g‘ri aralashgan. Futbolchi butsasining tag qismi bilan ochiqchasiga raqibiga qo‘pollik ishlatgan. Chetlatish uchun asos yetarli. Ekspert-hakamlar komissiyasi hakamlarning qarorini to‘g‘ri, deb hisobladi.

6-vaziyat: “Surxon” - “Olimpik” bellashuvi: bahsli vaziyat.

“Surxon” - “Olimpik” uchrashuvining -daqiqasida toshkentliklarning 81-raqamli vakili mezbonlarning 10-raqamli aʼzosining yuz qismiga zarba berdi. Bosh hakam Asker Najafaliyev dastlab nominal mezbonlar aʼzosiga sariq kartochka ko‘rsatdi. VAR hakami uni monitor yoniga chaqirgach esa referi qarorini o‘zgartirdi hamda ikkala o‘yinchini ham sariq kartochka bilan jazoladi.  

Ekspert-hakamlar komissiyasi qarori: Bu vaziyatda nominal mehmonlar futbolchisi raqibiga qo‘pollik ishlatgan, unga sariq kartochka ko‘rsatilishi to‘g‘ri bo‘lgan. Ammo termizliklar vakiliga keskin harakati uchun qizil kartochka ko‘rsatilishi kerak edi. Komissiya bosh hakamning birinchi ko‘rsatgan kartochkasi bo‘yicha qarorini noto‘g‘ri ekanini maʼlum qiladi.