Shu yilning 5-sentyabr sanasida O‘zbekiston milliy terma jamoasi JCH—2026 saralashi doirasida KXDR termasini qabul qiladi. Bellashuvga “Bunyodkor” arenasi mezbonlik qiladi.
Ushbu uchrashuvga stadionni normal holatda saqlash uchun PFL ikki o‘yinni boshqa maydonga ko‘chirdi.
“Xabaringiz bor, yozning chillasidan chiqish “Bunyodkor” uchun og‘ir kechdi. Ayni vaqtda stadion parvarishi uchun mas’ul tashkilotlar sentyabr oyiga qadar vaziyatni o‘nglash ustida ishlamoqda. Atrofi tribunalar bilan to‘liq o‘ralgan stadionlar maysasi avgust oyining so‘nggi 10 kunligiga kelibgina o‘zini tiklashni boshlaydi. Bir yil muqaddam “Bobur” arena foydalanishga topshirilayotgan vaqtda ham shunday muammo kuzatilgan, vaziyat sentyabrga kelib o‘nglangandi.
O‘zbekiston milliy terma jamoasining mundialga yo‘llanma olishi uchun barcha ish amalga oshirib kelinmoqda. Bunda kuz oyidagi rasmiy o‘yinlar davomida stadionning holati ham muhim ahamiyat kasb etadi. Shuni inobatga olgan holda Assosiatsiya, Liga va Superliga klublari o‘zaro kelishgan holda 17-turning “Bunyodkor” arenada o‘tishi kerak bo‘lgan ikki uchrashuvini istisno tariqasida “Do‘stlik” stadioniga ko‘chirishga qaror qildi. Endilikda O‘zFHM mazkur arenada VAR texnikasi ishlashi yuzasidan tegishli ishlarni amalga oshirishga kirishadi.
Shu tariqa “Lokomotiv” — “Qizilqum” bellashuvi 24-avgust kuni, “Bunyodkor” — “OKMK” uchrashuvi esa 27-avgust kuni “Do‘stlik” stadionida o‘tadigan bo‘ldi. Liga “Sport” telekanali bilan mazkur o‘zgarish yuzasidan kelishuvni amalga oshirgach, uchrashuvlar vaqti masalasida bir to‘xtamga keladi”, deyiladi PFL matbuoti xizmati bergan xabarda.
Ma’lumot uchun, JCH—2026 saralashi doirasidan o‘rin olgan 1-tur uchrashuvini O‘zbekiston milliy jamoasi “Bunyodkor” maydonida, 2-turni esa Bishkek shahridagi Dolen Omurzakov nomidagi stadionda o‘tkazadi.
Izoh (0)