G‘azo sektorida so‘nggi ikki kun ichida Isroil harbiylarining harakatlari oqibatida 60 dan ortiq falastinlik halok bo‘ldi, 150 ga yaqini yaralandi.
Bu haqida G‘azo Sog‘liqni saqlash vazirligi o‘zining Telegram kanalida xabar qildi.
“So‘nggi 48 soat ichida G‘azo sektorida 62 kishi halok bo‘ldi, yana 147 kishi jarohat oldi”, deyiladi vazirlik bayonotida.
Sektor Sog‘liqni saqlash vazirligi ta’kidlashicha, o‘tgan yilning oktyabr oyida Isroil harbiy amaliyoti boshlanganidan beri G‘azoning turli hududlarida jami 43 665 falastinlik halok bo‘lgan, 103 076 kishi jarohatlangan.
7-oktyabr voqealari
2023-yil 7-oktyabrda G‘azo sektoridan Isroil hududiga Falastinning HAMAS harakatining qurolli jangchilari kirib kelishi, chegaradagi aholi punktlari aholisining o‘ldirilishi va asirlarning garovga olinishi bilan birga Yaqin Sharqdagi vaziyat keskin yomonlashdi.
Bunga javoban Isroil anklavda HAMASning harbiy va siyosiy tuzilmalarini yo‘q qilish va o‘g‘irlab ketilganlarning hammasini ozod qilish maqsadida operatsiya boshladi.
G‘azo sektoridagi janglar shu kungacha davom etmoqda.
Trampning va’dasi
9-noyabr kuni Axios portali AQSHning saylangan prezidenti Donald Tramp Falastin milliy ma’muriyati rahbari Mahmud Abbos bilan telefon orqali muloqotda G‘azo sektoridagi urushni tugatish masalasini ko‘rib chiqishga va’da bergani xabar qildi.
Nashrning taʼkidlashicha, suhbatdan so‘ng Abbos bayonot bergan, unga ko‘ra Falastin rahbari Trampni saylangani bilan tabriklagan, unga davlat rahbari sifatida muvaffaqiyatlar tilagan va “u bilan adolatli va keng qamrovli tinchlikka erishish yo‘lida hamkorlik qilishga tayyorligini tasdiqlagan”.
Falastin rahbari o‘z bayonotida “Tramp urushni to‘xtatishga sodiqligini taʼkidlab, mintaqada tinchlikka erishish yo‘lida u hamda boshqa mintaqaviy manfaatdor tomonlar bilan hamkorlik qilishga tayyorligini yana bir bor qayd etdi”, deya ma’lum qildi.
Izoh (0)