Andijon va Qashqadaryo viloyatlarida imtiyozli kredit mablag‘larini talon-toroj qilish holatlari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Marhamat tuman bo‘limi tomonidan tergovga qadar tekshiruv o‘tkazilgan. Tekshiruvda “Z.T.” oilaviy korxonasi rahbari K.T. va boshqalar o‘zaro til biriktirib, hududiy tijorat banki filialidan tikuv dastgohlari va mato sotib olish uchun ajratilgan 8 milliard so‘m kredit mablag‘lari evaziga shartnomada ko‘rsatilgan uskunalarni olib kelmasdan, ishlab chiqarish faoliyatini yo‘lga qo‘yilgani haqida soxta hujjatlarni rasmiylashtirib, juda ko‘p miqdordagi kredit mablag‘larini o‘zlashtirish yo‘li bilan talon-toroj qilgani aniqlangan.
Shu kabi, departamentning Andijon tuman bo‘limi tomonidan o‘tkazilgan tergovga qadar tekshiruvda “B.k.”, “G-M.” va “B.B.” MCHJlar rahbari G.M. va boshqalar o‘zaro til biriktirib, AT “Xalq banki” Kuyganyor filialidan ushbu MCHJlarga ajratilgan jami 2,2 milliard so‘m imtiyozli kredit mablag‘lari hisobiga sotib olingan ishlab chiqarish dastgohlari va qishloq xo‘jaligi texnikalarini kredit taʼminoti sifatida garovga qo‘ymasdan, boshqa shaxslarga sotib yuborib, imtiyozli kredit mablag‘larini o‘zlashtirish yo‘li bilan talon-toroj qilgani ma’lum bo‘ldi.
Departamentning Kasbi tuman bo‘limi tomonidan o‘tkazilgan tergovga qadar tekshiruvda tuman hokimining “M.” MFY bo‘yicha sobiq yordamchisi D.Z. va fuqaro A.Sh. o‘zaro til biriktirib, to‘rt nafar fuqaro nomiga oilaviy tadbirkorlikni rivojlantirish uchun ajratilgan jami 130,6 million so‘m imtiyozli kredit mablag‘larini firibgarlik yo‘li bilan qo‘lga kiritgani aniqlangan.
Mazkur holatlar yuzasidan Jinoyat Kodeksining 167-moddasi (o‘zlashtirish yoki rastrata yo‘li bilan talon-toroj qilish), 168-moddasi (firibgarlik), 205-moddasi (hokimiyat yoki mansab vakolatini suiisteʼmol qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari olib borilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi.
Izoh (0)