Avstraliya hukumati 26-avgust kuni Eronning Kanberradagi elchisini mamlakatdan chiqarib yuborishni ma’lum qildi. Bu haqda Al Arabiya xabar berdi.
Ta’kidlanishicha, tegishli qaror Eron tomonidan Sidney va Melburn shaharlarida amalga oshirilgan antisemitik hujumlarga javoban qabul qilingan. Mamlakatdagi shu va shunga o‘xshash voqealarga Avstraliya bosh vaziri Entoni Albanese quyidagicha munosabat bildirgan:
“Bu harakatlar Avstraliya hududida xorijiy davlat tomonidan uyushtirilgan, favqulodda va xavfli tajovuz harakatlari bo‘lib, jamiyatimizning birdamligini zaiflashtirishga va ijtimoiy nizolarni kuchaytirishga qaratilgan”.
Avstraliya Eron poytaxti Tehrandagi elchixonasining faoliyatini allaqachon to‘xtatgan va barcha diplomatlari xavfsiz uchinchi davlatga ko‘chirilganini ma’lum qilgan. Shuningdek, Albanese hukumati Eronning Islom inqilobiy qo‘riqchilar korpusini (Islamic Revolutionary Guard Corps) terror tashkiloti sifatida tan olish niyatida ekanini bildirmoqda.
2023-yil oktyabr oyida Isroil va G‘azo o‘rtasidagi urush boshlanganidan beri Avstraliyada yahudiylarga qarshi hujumlar ko‘paygan, xususan, uylar, maktablar va sinagogalarda. Bunday voqealardan biri iyul oyida sodir bo‘lib, unda Melburndagi sinagogaga o‘t qo‘yilgandi. Politsiya ushbu hujumni sodir etishda ayblanayotgan shaxsga qarshi jinoyat ishi qo‘zg‘agan.
Avstraliya va Eron o‘rtasidagi munosabatlar so‘nggi yillarda taranglashgan. G‘azo va Isroil o‘rtasidagi mojarolar butun dunyoda, jumladan Avstraliyada ham ijtimoiy norozilik va ziddiyatlarni kuchaytirmoqda. Mamlakatdagi yahudiy jamiyati bu hujumlardan keyin xavfsizlik choralarini kuchaytirgan va hukumatdan yanada kuchliroq himoya talab qilmoqda.
Izoh (0)