Fransiyalik hujumchi Ugo Ekitike so‘nggi 12 yil ichida “Liverpul” safida ilk uchta o‘yinida gol urishga muvaffaq bo‘lgan ikki futbolchidan biriga aylandi. Bu haqda Championat nashri xabar bermoqda.
23 yoshli forvard Angliya Premyer Ligasi 2-turi doirasidagi “Nyukasl”ga qarshi bahsning (3:2) 46-daqiqasida o‘zining “qizillar” safidagi navbatdagi golini kiritishga muvaffaq bo‘ldi. Avvalroq u Angliya Superkubogi doirasida “Kristal Pelas”ga qarshi o‘yinda (2:2, penaltilar seriyasi – 2:3) hamda APLning 1-turidagi “Bornmut”ga qarshi bellashuvda (4:2) raqib darvozasini ishg‘ol qilgan edi.
Ekitikedan avval bunday natijaga “Liverpul” safida faqatgina angliyalik hujumchi Daniel Starrij erishgan. U 2013-yilda “Chelsi”dan “qizillar” jamoasiga o‘tgan va klub safidagi dastlabki to‘rt uchrashuvda ham gol urishga muvaffaq bo‘lgan.
Eslatib o‘tamiz, Ugo Ekitike 2025-yilgi yozgi transfer oynasi vaqtida Germaniyaning “Ayntraxt” klubidan 95 million yevro evaziga “Liverpul”ga ko‘chib o‘tgan.
Ma’lumot o‘rnida: “Nyukasl” hamda “Liverpul” jamoalari o‘rtasida bo‘lib o‘tgan uchrashuvda mersisaydliklar 3:2 hisobida zafar quchdi. Ayni paytda Arne Slot boshchiligidagi jamoa dastlabki ikki turdan keyin 6 ochko jamg‘arib, musobaqada 100 foizlik natija qayd etib turibdi. Shuningdek, “Arsenal” va “Tottenhem” jamoalari hisobida ham 6 ochko mavjud.
Ekitike hozirga qadar mersisaydliklar safida 3 ta uchrashuvda maydonga tushib, 3 ta gol va 1 ta golli uzatmaga mualliflik qilgan. Futbolchining “Liverpul” klubi bilan tuzgan shartnomasi 2031-yilning yoziga qadar amal qiladi. Transfermarkt portali hujumchining qiymatini 75 million yevro deb baholagan.
Izoh (0)