Jizzax va Andijon viloyatlarida o‘zgalarning kredit mablag‘larini o‘zlashtirgan shaxslar aniqlandi

Jizzax va Andijon viloyatlarida kredit mablag‘larini o‘zlashtirish holatlari aniqlandi, deb xabar beradi Bosh prokuratura huzuridagi departament.

Qayd etilishicha, departamentning Sharof Rashidov tuman bo‘limi tomonidan tergovga qadar tekshiruv o‘tkazilgan. Tekshiruvda “J.q.” MCHJ rahbari B.Q. 7 nafar fuqaroga tadbirkorlik faoliyati uchun ajratilgan kredit evaziga taʼminotchi korxona sifatida mahsulotlarni yetkazib bermasdan 200 million so‘m kredit mablag‘ini o‘zlashtirgani aniqlangan.

Departamentning Qo‘rg‘ontepa tuman bo‘limi tomonidan o‘tkazilgan tergovga qadar tekshiruvda Sh.N. ismli shaxs (muqaddam sudlangan) fuqaro S.A.ni aldab, uning turmush o‘rtog‘i Y.U.ning nomiga bank filialidan uy-joy sotib olish uchun kredit ajratib berishi evaziga 2,6 ming dollarni firibgarlik yo‘li bilan qo‘lga kiritgan, shuningdek, bankning dasturiy ilovasi orqali uning nomiga 31,7 million so‘m onlayn-mikroqarz ajratishga erishib, ushbu mablag‘larini o‘zining shaxsiy ehtiyojlari uchun sarflab yuborgani aniqlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi. Shuningdek, Toshkent viloyatida fermer xo‘jaligi 3,1 mlrd so‘m imtiyozli kredit mablag‘ini o‘zlashtirgani ma’lum bo‘lgan edi.