Xonanda Sardor Mamadaliyev “O‘zimizning gaplar” ko‘rsatuviga bergan intervyusida noto‘g‘ri yo‘nalishda qo‘shiq kuylashi va uni nega hamkasblari yoqtirmasligiga oydinlik kiritib o‘tdi.
— Yo‘nalishim professional xonandalar uchun noto‘g‘ri hisoblanadi. Hamisha shu yo‘nalishda qo‘shiq kuylansa ovozga jiddiy jarohat yetishi mumkin. Albatta, ularning tanqidlarini qabul qilaman, ammo menga shu yo‘nalishda kuylash yoqadi. Avvaliga hamkasblarning e’tirozi yoki qiziqchilarning hazil gap-so‘zlarini og‘ir qabul qilardim. Keyinchalik bunga e’tibor bermay, maqsadim sari harakatlanishga qaror qildim. “60 yoshga borib ovozingizdan ayrilib qolishingiz mumkin”, deyishadi. U haqida o‘ylashni xohlamayman, muhimi hozir maroq bilan ijod qilyapman, — deydi xonanda Sardor Mamadaliyev.
Xonanda hamkasblari uni yoqtirmasligi va nota bilmaydigan ijodkorlar nega yaxshi natijaga erishayotganini aytib o‘tdi.
— Professional xonandalarning ko‘pchiligi meni yoqtirmaydi. Bunga ham yo‘nalishim sabab bo‘lsa kerak. Men ham ijodimni boshqalarga o‘xshash yo‘nalishda boshlaganman. O‘sha yillari bastakor Musaxon Nurmatov bilan hamkorlik qilib, bir yo‘nalishda qo‘shiq kuylash urf bo‘lgan paytlar edi. Ammo qo‘shiq yaxshi natijaga erishmagan. Shundan keyin nega men hammaga o‘xshab qo‘shiq kuylashim kerak, deb o‘z-o‘zimga savol berganman. Keyin o‘zim hurmat qilib qo‘shiqlarini tinglaydigan xonandalarning yo‘nalishidan bir chimdimdan olib, mix yo‘nalish hosil qilganman. Men Botir Qodirov yoki Shohjahon Jo‘rayevga taqlid qilmayman. Ammo Sherali Jo‘rayevning ijodini kuzatib boraman, — deydi xonanda Sardor Mamadaliyev.
Izoh (0)