Marhum ijodkor Oxunjon Madaliyevning o‘g‘li Qilichbek otasining izidan borib, sanʼat yo‘lini tanladi. Ozmi-ko‘pmi mashhurlikka erishib, o‘z muxlislarini topdi. Xo‘sh, 34 yoshni qarshilagan xonanda faoliyatini qanday boshladi, agar otasi sanʼatkor bo‘lmaganida u xonanda bo‘la olarmidi?
“Tortinchoq yigit bo‘lganman”
Qilichbek Madaliyev 1990-yilning 17-yanvar kuni Farg‘ona viloyatining Oltiariq tumanida dunyoga kelgan. U oilada ikki qizdan keyin dunyoga kelgan o‘g‘il farzand bo‘lgan.
— Onamning aytishicha, dadam rahmatli “Tezroq o‘g‘lim ulg‘aysa, uni to‘ylarga olib borsam”, deb ko‘p gapirgan ekan. Men ham 3-4 marta o‘zi bilan to‘yga olib borganini eslayman. Ammo bolalikdan nihoyatda tortinchoq yigit bo‘lganim uchun odamlar bilan til topishib ketolmasdim. To‘ylarda zerikib, bir burchakda o‘tiraverardim. Shu bois “Yo‘q, men to‘yga bormayman”, deganman.
Bolaligim juda oddiy o‘tgan. Ko‘pchilik sanʼatkorlar maktab tadbirlarida faol bo‘lgani, qo‘shiqlar aytib tanlovlarda ishtirok etganini so‘zlab beradi. Men umuman boshqacha bola edim. 7-sinfga qadar birorta maktab tadbirida ishtirok etmaganman, hatto sheʼr yodlashni ham istamasdim. Darslarda ustozlar majburan old qatorga o‘tkazmasa, orqa qatorda o‘tirib, faqat darsni tinglardim xolos. Sho‘xliklar, bolalarcha o‘yinqaroqliklar umuman bo‘lmagan, — deydi Qilichbek Madaliyev.
“Dadam olamdan o‘tganida 10 yoshda edim”
Xonanda sanʼatkor emas, prokuror bo‘lishni istagani haqida gapirdi.
— Tortinchoq yigit bo‘lsam ham maktabda juda mashhur edim. Odamlar qo‘li bilan ko‘rsatib “Ana, Oxunjon Madaliyevning o‘g‘li. Dadasiga rosa o‘xsharkan”, deb pichirlab gapirganini eshitib qolardim. Ammo o‘sha paytda biror insonga dadamning nomini aytib maqtanganimni eslolmayman.
Ustozlar qaysi kasbni tanlash haqida so‘rasa, prokuror bo‘laman derdim. Ammo bu kasbning nima ish bilan shug‘ullanishini bilmasdim. Dadam rahmatli sanʼatkor bo‘lishimni orzu qilardi. Dadam olamdan o‘tgan payt bor-yo‘g‘i 10 yoshda edim. 13-14 yoshlarga borib ichimda qandaydir olov lovullagandek bo‘ldi va o‘z-o‘zidan sanʼatga qiziqib qoldim, — deydi xonanda.
“Odamlar dadam uchun pul qistirishdi”
Xonanda ilk marta to‘yga chiqqani va qo‘shig‘i uchun emas, dadasining hurmati uchun unga juda ko‘p pul qistirgani haqida esladi.
— Dadamni juda kam ko‘rardim. Dadam uyga kelganida biz uxlab qolardik, ertalab esa u dam olayotgan bo‘lardi. Baʼzida haftalab dadamni ko‘rolmasdik. Ammo dadamning juda yaxshi odati bor edi. “Men bolalarimni sog‘indim”, deb kechasi bo‘lsa-da, yonimizga kirib yuz-ko‘zlarimizdan o‘parkan.
Dadam vafot etganidan keyin ancha vaqt o‘tib, hamkasblaridan biri o‘zi bilan to‘yga olib boradigan bo‘ldi. U paytda dadamning qo‘shiqlarini kuylardim. Boshlovchi tanishtirganidan keyin odamlar ko‘zida yosh bilan qarshiladi va juda ko‘p pul qistirdi. Yosh bolaman, o‘zimni qanday tutishni ham bilmasdim. Pullarning barini onamga berganimda “Mening o‘g‘lim ham pul topadigan yigit bo‘libdi”, deb rosa yig‘lagandi, — deydi xonanda.
“Dadamning dushmanlari haqida gapirishni istamayman”
Qilichbek Madaliyev “Oxunjon Madaliyevning sirli o‘limi va unga zahar berishgani” haqidagi mish-mishlarga o‘z munosabatini bildirdi.
— Bu gaplar mutlaqo asossiz. Dadamning do‘stlari juda ko‘p bo‘lgan. Dushmanlari haqida gapirib o‘tirishni istamayman. To‘g‘ri u paytda juda yosh bo‘lganman, ammo bilganim dadamning yuragi xuruj qilgan. O‘limiga suiqasd va zaharlash aloqador emas. Yaratganning belgilab bergan umri bor, agar shunday bo‘lgan taqdirda ham peshonada o‘lim bo‘lmasa, odam tirik qoladi, — deydi Qilichbek Madaliyev.
“15 yoshimda katta sahnaga chiqqanman”
Xonanda ilk bor 2005-yil sahnaga chiqqani va “Dadamning muxlislari” nomli qo‘shig‘ining yaratilish tarixi haqida so‘zlab berdi.
— Dadamning qo‘shiqlarini ijro etib, to‘ylarga chiqib yurgan paytlarim edi. Bir kuni dadamning do‘stlaridan biri shoir Mirzo Karim bilan suhbatlashib qoldik. “Dadamning muxlislari yaxshi kutib oldi, duo qildi”, deb to‘lib-toshib gapirib berayotganimda “Xuddi shu haqida qo‘shiq ayting”, deb tavsiya qildi. Qo‘shiqning mavzusi oddiy suhbat jarayonida paydo bo‘ldi. O‘sha yili Muhabbat Hamroyeva rejissor Zokir Qayumov bilan “Unutmoq osonmas” nomli konsert dasturini o‘tkazadigan bo‘ldi va meni ham taklif qildi. 2005-yil ilk bor katta sahnaga chiqqanman. O‘shanda bor-yo‘g‘i 15 yoshda edim. Ishonasizmi, odamlar shu qadar ko‘p guldastalar berganki, haligacha buncha ko‘p gulni olmaganman. Dadamning muxlislari yig‘lagan, ammo yosh bo‘lganim uchun buning zavqini u qadar anglab yetmaganman, — deydi Qilichbek Madaliyev.
“Sardor Mamadaliyevdan ranjiganman”
Qilichbek otasining qo‘shiqlarini ijro etgani uchun xonanda Sardor Mamadaliyevdan ranjigani va u bilan jiddiy nizoga ham borgani haqida so‘zlab bergan.
— Albatta, ranjiganman. Sababi u qo‘shiqni buzib ijro etgan. Muxlislarning ham dili og‘rigan. Shu bois Sardor Mamadaliyev bilan bu tarzda qo‘shiqni buzib aytmaslik bo‘yicha kelishib olganmiz. Hatto, ustozlar qo‘shiqlarini buzib aytadigan xonandalarga bag‘ishlab Mirzo Karim so‘zi asosida qo‘shiq ham yaratgandim, — deydi xonanda Qilichbek Madaliyev.
Shaxsiy hayoti haqida gapirishni istamaydi
Oxunjon Madaliyevning ikki qiz va ikki o‘g‘il farzandlari bor. Ayni kunda ularning barchasi oilali, bu yil kenja o‘g‘li ham uylandi. Qilichbek Madaliyev oilasi va shaxsiy hayoti haqida gapirishni unchalik istamaydi. Faqatgina 2015-yil oila qurgani va ikki farzandning otasi ekanligini ommaga oshkor qilgan xolos.
Izoh (0)