Hindiston Ukraina armiyasiga Yevropa Ittifoqi orqali artilleriya o‘q-dorilarini yuborish orqali Ukrainaning jangovar qobiliyatini qo‘llab-quvvatlaydi va o‘tgan yil davomida Rossiyaning ushbu ta’minotni to‘xtatish haqidagi talablarini ikki marta rad etdi. Bu haqda Hindiston va Yevropa rasmiylariga tayanib Reuters xabar berdi.
Ukrainaga YI davlatlari orqali Hindiston snaryadlarini yetkazib berish masalasini Rossiya TIV rahbari Sergey Lavrov hindistonlik hamkasbi Subrahmanyama Jayshankar bilan iyul oyida bo‘lib o‘tgan uchrashuvda ko‘targan edi. Reuters’ga ko‘ra, Lavrov Jayshankarga bosim o‘tkazgan va Ukraina armiyasiga berilgan o‘q-dorilarning bir qismi Hindistondagi davlat korxonalari tomonidan ishlab chiqarilganini ta’kidlagan.
Moskva Nyu-Dehlini yetkazib berishni to‘xtatishga ko‘ndira olmaganiga qaramay, Kreml Hindiston Bosh vaziri Narendra Modining iyul oyidagi Rossiyaga safarini do‘stlik tashrifi sifatida qabul qilgan.
Hindiston hukumatidagi hamda mudofaa sanoatidagi manbalarga ko‘ra, mamlakat Ukraina tomonidan ishlatiladigan o‘q-dorilarning juda oz miqdorini ishlab chiqaradi. Ma’lum bo‘lishicha, gap Kiyev urush boshlanganidan keyin olgan qurollarning umumiy miqdorining 1 foizdan kamrog‘i haqida ketmoqda.
Reuters tomonidan ko‘rilgan bojxona ma’lumotlariga ko‘ra, Hindistondan YIga artilleriya snaryadlari eksporti bir yildan ortiq davom etmoqda. Jumladan, 155 mm kalibrli kuchli portlovchi snaryadlar, 120 va 125 mm kalibrli o‘q-dorilar hamda 120 va 125 mm kalibrli minomyot snaryadlarini yetkazib berish ishlari olib borilmoqda.
Izoh (0)