Afg‘onistonlik taksi haydovchilariga avtomobillarini qayta bo‘yash tugaguniga qadar shahar va kichik shaharchalar yo‘llarida harakatlanish taqiqlanadi, aks holda ular jiddiy huquqiy oqibatlarga va hatto jinoiy javobgarlikka tortiladi.
“Barcha taksi haydovchilaridan zudlik bilan iltimosim shuki, transport vositalarini bo‘yashga jo‘natishda jarayon to‘liq yakunlanmaguncha shahar bo‘ylab harakatlanishdan saqlansinlar”, deydi Kobul transport politsiyasi boshlig‘i Xiyal Muhammad Gavar.
Afg‘onistonda taksilarni sariqdan oq-ko‘k rangga qayta bo‘yash qonuni 2023-yilning may oyida qabul qilingan edi. Mamlakat transport politsiyasi avvalroq xabar berganidek, ushbu chora Afg‘oniston a’zo bo‘lgan 1973-yildagi Yo‘l harakati to‘g‘risidagi Vena konvensiyasi qoidalariga rioya qilish uchun ko‘rilgan.
Uning tushuntirishicha, afg‘on taksilari bo‘yalgan sariq rang u yerda ko‘rsatilmagan, shuning uchun ular “to‘g‘ri” ranglardan birini, ya’ni ko‘k rangni tanlab, uni oq rang bilan to‘ldirishgan.
Taksi haydovchilariga mashinalarni qayta bo‘yash uchun uch oydan ko‘p bo‘lmagan muddat berilgan, ammo mahalliy OAV xabariga ko‘ra, bu jarayon uzoq davom etdi, chunki mashinani bo‘yash juda qimmat va ko‘pchilik avtomobil egalarida bunga pul yo‘q. Ushbu buyruqni bajarmaganlik uchun jarimaga tortilmaslik maqsadida haydovchilar ko‘pincha davlat raqamlarisiz yurmoqda.
Mamlakat yo‘l harakati bosh boshqarmasi maʼlumotlariga ko‘ra, Afg‘onistonning to‘rt viloyatida 20 mingdan ortiq taksi allaqachon bo‘yalgan.
Izoh (0)