Yelena Zelenskaya: “Agar dunyo Ukrainaga yordam berishdan charchasa, biz o‘limga mahkummiz”

Yelena Zelenskaya, agar G‘arb davlatlari moliyaviy yordam ko‘rsatishda davom etmasa, ukrainaliklar “o‘limga mahkum ekani”dan ogohlantirdi.

Ukrainaning birinchi xonimi AQSHda respublikachi senatorlar Ukraina va Isroilga yordam berish to‘g‘risidagi qonun loyihasini bloklaganining ertasiga BBC’ga intervyu berdi.

AQSH tomonidan Ukrainaga 60 milliard dollar miqdorida moliyaviy yordam ko‘rsatilishi rejalashtirilgandi.

“Agar dunyo Ukrainaga yordam berishdan charchasa, bizni o‘limga mahkum qilgan bo‘lishadi”, — dedi Zelenskaya.

“Yordam berishga bo‘lgan ishtiyoq so‘nishi mumkinligi haqidagi signallarni ko‘rish biz uchun juda og‘riqli. Biz uchun bu omon qolish masalasi. Shuning uchun buni ko‘rish og‘riqli”, — dedi u.

Buyuk Britaniya tashqi ishlar vaziri Devid Kemeron shu hafta Vashingtonga tashrifi chog‘ida AQSH Rossiyaga qarshi urushda Ukrainani qo‘llab-quvvatlayotgan G‘arb koalitsiyasining “tayanchi” ekanligini aytgandi.

U urushni davom ettirish uchun zarur bo‘lgan milliardlab dollarlik moliyaviy yordamni cheklashi orqali Putinga “Rojdestvo sovg‘asi” berishdan AQSHni qaytardi.