O‘qituvchi huquqiy, ijtimoiy va moliyaviy tomondan himoya qilingan va yetarli ta’minlangan bo‘lishi kerak. Bu haqda Shavkat Mirziyoyev Abdulla Avloniy nomidagi Pedagogik mahorat milliy institutida ta’lim-tarbiya sohasi vakillari bilan muloqotida aytib o‘tdi.
“Vatan va xalq manfaati uchun mardona kurashadigan, faol fuqarolik pozisiyasiga ega, bilimli va bunyodkor avlodni kim tarbiyalaydi? Albatta, sizlar – zahmatkash va jonkuyar ustozlar. Buning uchun avvalo o‘qituvchining o‘zi huquqiy, ijtimoiy va moliyaviy tomondan himoya qilingan va yetarli ta’minlangan bo‘lishi kerak. Shundagina u o‘zining chinakam insoniy va kasbiy fazilatlarini amalda namoyon qila oladi”, dedi prezident.
Davlat rahbari o‘zi ham ko‘p yillar shu sohada ishlagani uchun o‘qituvchi mehnati qanchalik og‘ir va mashaqqatli ekanini yaxshi bilishini aytdi.
“Yangilangan Konstitutsiyamizda dunyodagi mo‘tabar shaxs — o‘qituvchi maqomini alohida mustahkamlash, bu kasbni jamiyatdagi eng obro‘li ishga aylantirish mening necha yillik orzuim, kerak bo‘lsa, armonim edi”, dedi prezident.
Shavkat Mirziyoyev endilikda “Pedagogning maqomi to‘g‘risida”gi qonun qabul qilinganini. Konstitutsiyada belgilangan qoida endi ana shu qonun asosida ishlay boshlashini ta’kidlab o‘tdi.
“Kimki o‘qituvchiga bosim o‘tkazib, uning kasb faoliyatiga daxli bo‘lmagan ishlarga, turli majlislarga jalb etmoqchi bo‘lsa, ana shu qonun asosida javobgarlikka tortiladi”, dedi prezident.
Izoh (0)