O‘zbekistonda advokatlik institutining bugungi kundagi mavqeyi qay darajada, advokatlar daromadi qancha bo‘lishi mumkin, advokatlik rostdan ham insonga har bir holatni boshidan o‘tkazmasa ham birovlarning aniqrog‘i mijozlarining hayotidagi xato-kamchiliklardan ham xulosa qilish imkoniyatini beradimi? Inbazar savdo markazi rahbarining qo‘l ostidagilariga zo‘ravonlik qilishiga yuristlar qanday munosabat bildiradi? “Daryo” jurnalisti yuridik fanlari doktori, advokat, yurist biznesmen Axtam Yakubov bilan aynan shu mavzular atrofida suhbatlashdi.
Huquqiy ong va madaniyat past bo‘lgan mamlakatlarda jinoyatchilikning soni oshib ketadi, o‘zbilarmonlik avj oladi, bunday mamlakatlarda fuqarolar qonun-qoidalar bilan yashamaydi, hammaning o‘z qoidasi bo‘ladi. Qashshoqlik nihoyatda ko‘payadi. Huquqiy ong va madaniyat yuqori mamlakatlarda esa barcha uchun yaratilgan umumqoidalarga hurmat yuqori bo‘ladi, hamma bunga amal qiladi. Odamlarda sudga va davlatga ishonch yuqori bo‘ladi, deydi Axtam Yakubov suhbat avvalida.
Huquqshunosga ko‘ra, rivojlangan mamlakatlarda, shu jumladan O‘zbekistonda ham har bir fuqaroda huquqbuzarlikka nisbatan toqatsizlik kayfiyati bo‘lishi kerak va bu shart.
Mana masalan yo‘lda yo‘l harakati xavfsizligi qoidalariga amal qilmagan insonning harakatini videoga olib, xabar berganlarni rag‘batlantirish mexanizmi bor. Shuningdek, savdo do‘konida savdo qilsangiz, savdogar sizga chekini bermasa bu haqida ham xabar berilsa mukofotlash tizimi joriy qilingan. Aslida huquqiy ongimizning pastligi sabab bu yangiliklarni ham o‘zi uchun tirikchilikka aylantirib olganlar paydo bo‘ldi. Odatda huquqbuzarlikka qarshi kurashish, bu haqda mas’ullarga hech qanday mukofotlarsiz xabar berish, bu holatlarga nisbatan toqasiz bo‘lish har bir fuqaroning fuqarolik burchi hisoblanadi, deydi suhbatdosh advokat.
Advokat Axtam Yakubov Sergelidagi Inbazar rahbarining qo‘l ostida faoliyat yurituvchi xodimlarga zo‘ravonlik qilib kelganiga ham munosabat bildirdi.
Toshkentdagi yirik savdo markazlaridan biri, nomini tilga olmaylik uning rahbari ishchisiga kuch ishlatyapti. Bu ibtidoiy jamoa tuzumi davridagi holatning bir ko‘rinishida. Bu yovvoyi, noinsoniy munosabatda. Buni axloqli jamiyatning qabul qilishi mutlaqo noto‘g‘ri, deydi huquqshunos.
Axtam Yakubov suhbat davomida jurnalistning advokatlar gonorari borasidagi savollariga javob qaytarar ekan, O‘zbekistonda huquqshunoslar yaxshi yashayotganini, ularning daromadi bugun sezilarli darajada oshganini aytdi.
Bugun O‘zbekistonda yuristlar yomon yashamayapti. Ayniqsa, advokatlar. Shaxsan o‘zim vaqti kelganda bir soatlik huquqiy maslahatim uchun 5 ming dollar haq olganman. Ayni kundagi xizmat haqim ham AQSH dollarida besh xonali sonlarda belgilangan, deydi Axtam Yakubov.
Suhbatdosh huquqshunos advokatlik mas’uliyati haqida gapirar ekan, himoyachilik kasbi nafaqaga chiqqan yuristlar uchun tirikchilik manbai bo‘lib qolmasligini, bu kasb egasi doimiy ravishda izlanishda bo‘lishi lozimligini ta’kidlamoqda.
Izoh (0)