Ukraina hududidagi Rossiya qurollaridan topilgan xorijiy ehtiyot qismlarning qariyb 60 foizi Xitoydan keladi, dedi Ukraina prezidenti Vladimir Zelenskiyning maslahatchisi Vladislav Vlasyuk.
“Agar barcha an'anaviy qurol turlarini olib, ulardagi xorijiy komponentlar hisoblansa, taxminan 60% Xitoyniki bo‘lib chiqadi. Biz bu haqda ba'zi ishlab chiqaruvchilar bilan uzoq vaqt muhokama qildik. Men aytmoqchimanki, eng katta muammo Rossiyaga qurol uchun komponentlar yetkazib berayotgan Xitoyda”, deya Vlasyuk so‘zlaridan iqtibos keltirmoqda Reuters.
Uning so‘zlariga ko‘ra, Rossiya Xitoy komponentlaridan dronlar, kuzatuv tizimlari va raketalarda foydalanadi. Ba'zi qismlar AQSH, Niderlandiya, Yaponiya, Shveysariya va boshqa G'arb davlatlaridan ham yetkazib beriladi.
Avvalroq Xitoy dunyo mamlakatlarini jungli qonunidan voz kechib, xalqaro huquq ustuvorligini mustahkamlashga chaqirgani xabar qilingandi.
“Kuchlilarga zaiflarni qo‘rqitishga ruxsat berilgan jungli qonunidan voz kechib, xalqaro huquq ustuvorligini mustahkamlash kerak. Jahonda hukmron bo‘lishga intilishni jilovlash, bir tomonlama sanksiyalarga chek qo‘yish, rivojlanayotgan mamlakatlarning qonuniy huquq va manfaatlarini himoya qilish zarur. Biz yaxshi kelajak qurishimiz kerak”, dedi Xitoy tashqi ishlar vaziri Van I.
Izoh (0)