Украина ҳудудидаги Россия қуролларидан топилган хорижий эҳтиёт қисмларнинг қарийб 60 фоизи Хитойдан келади, деди Украина президенти Владимир Зеленскийнинг маслаҳатчиси Владислав Власюк.
“Агар барча анъанавий қурол турларини олиб, улардаги хорижий компонентлар ҳисобланса, тахминан 60% Хитойники бўлиб чиқади. Биз бу ҳақда баъзи ишлаб чиқарувчилар билан узоқ вақт муҳокама қилдик. Мен айтмоқчиманки, энг катта муаммо Россияга қурол учун компонентлар етказиб бераётган Хитойда”, дея Власюк сўзларидан иқтибос келтирмоқда Reuters.
Унинг сўзларига кўра, Россия Хитой компонентларидан дронлар, кузатув тизимлари ва ракеталарда фойдаланади. Баъзи қисмлар АҚШ, Нидерландия, Япония, Швейцария ва бошқа Ғарб давлатларидан ҳам етказиб берилади.
Аввалроқ Хитой дунё мамлакатларини жунгли қонунидан воз кечиб, халқаро ҳуқуқ устуворлигини мустаҳкамлашга чақиргани хабар қилинганди.
“Кучлиларга заифларни қўрқитишга рухсат берилган жунгли қонунидан воз кечиб, халқаро ҳуқуқ устуворлигини мустаҳкамлаш керак. Жаҳонда ҳукмрон бўлишга интилишни жиловлаш, бир томонлама санкцияларга чек қўйиш, ривожланаётган мамлакатларнинг қонуний ҳуқуқ ва манфаатларини ҳимоя қилиш зарур. Биз яхши келажак қуришимиз керак”, деди Хитой ташқи ишлар вазири Ван И.
Изоҳ (0)