Ukraina prezidenti Vladimir Zelenskiy mamlakat mudofaa byudjetini 500 milliard grivnaga (taxminan 12 mlrd dollar) oshirish haqidagi qonunni imzoladi.
“Ukrainaning harbiy byudjeti 3,73 trillion grivnani tashkil etadi, bu Rossiya tomonidan boshlangan keng ko‘lamli urush boshlanishidan oldingi byudjetdan 2,3 baravar ko‘pdir”, dedi Oliy Rada deputati Yaroslav Jeleznyak.
Hujjat Ukraina parlamenti saytida joylashtirilgan. Oliy Rada 18-sentyabr kuni harbiy xarajatlarni oshirish to‘g‘risidagi qonun loyihasiga ovoz bergan.
Byudjet qo‘mitasi rahbari Roksolana Pidlasa qo‘shimcha mablag‘lar, jumladan, davlat qarziga xizmat ko‘rsatish va to‘lash xarajatlarini kamaytirish hamda ichki davlat qarz obligatsiyalarini qo‘shimcha joylashtirish hisobidan olinishi kutilayotganini ta’kidlagan. Bundan tashqari, soliq yig‘ish rejasi ortig‘i bilan bajarilishi kutilmoqda.
Harbiy byudjetni 500 milliard grivnaga oshirish haqidagi qonun loyihasi Ukraina hukumati tomonidan iyun oyida parlamentga taqdim etilgan edi.
Izoh (0)