Rossiya TIV Isroilning Livanga bergan keng ko‘lamli zarbalarini qoralab chiqdi

Rossiya Isroilning Livandagi harbiy harakatlarini zudlik bilan to‘xtatishga chaqiradi, dedi TIV matbuot kotibi Mariya Zaxarova.

U, shuningdek, vazirlik Yaqin Sharqning keng miqyosli qurolli mojaroga tortilishining oldini olish uchun xalqaro va mintaqaviy hamkorlar bilan uchrashuvlar o‘tkazishga tayyorligini maʼlum qildi.

“Biz Livanga qarshi amalga oshirilayotgan keng ko‘lamli harbiy hujumlarni keskin qoralaymiz. Biz, ayniqsa, tinch aholini nishonga olgan hujumlarga qat’iy yo‘l qo‘yib bo‘lmasligi haqidagi prinsipial pozitsiyamizni alohida ta’kidlamoqchimiz”, deyiladi Zaxarovaning bayonotida.

23-sentyabr kuni kechqurun Isroil mudofaa kuchlari Livanda “Shimolning o‘qlari” operatsiyasi boshlanganini e’lon qildi. Isroil o'z maqsadini “Hizbulloh” harakatining harbiy infratuzilma obyektlarini yo'q qilish deb atagan.

Bugun, 24-sentabr kuni Isroil Livan hududiga hujum qilishni davom ettirdi. Livan Sog‘liqni saqlash vazirligining so‘nggi maʼlumotlariga ko‘ra, hujumlar oqibatida 558 kishi halok bo‘lgan, 1,8 mingdan ortiq kishi jarohatlangan.

Mojaro 17 va 18-sentyabr kunlari Livanda peyjerlar va boshqa aloqa vositalarining ketma-ket portlashi ortidan avj oldi. Portlashlar oqibatida 30 kishi halok bo'ldi, 3 mingga yaqin kishi jarohat oldi. “Hizbulloh” voqeada Isroilni aybladi. Isroil prezidenti Isaak Gertsog mamlakatning Livandagi voqealarga aloqasi yo‘qligini ta’kidladi.