Kinodagi rollari muvaffaqiyatli chiqishi uchun yulduzlar ba’zan tashqi ko‘rinishini tanib bo‘lmas darajada o‘zgartirishiga to‘g‘ri keladi. Quyida yosh aktyorlarning grimyorlar yordami bilan keksa qiyofada gavdalangan mashhur filmlarni yodga olamiz.
Bred Pitt, “Benjamin Battonning sirli voqeasi”
Tug‘ilishi bilanoq 80 yoshli qari kishiga aylangan noyob obrazi uchun Bred Pitt “Oskar”ga nomzod bo‘lgan, ammo aynan grimyorchilar ishi filmga yuksak mukofot olib kelgan. Obraz tayyor bo‘lishi uchun Pitt vizajistlar kursisida soatlab o‘tirishi kerak edi. Yulduzning yuziga har kuni silikon niqob taqilar edi.
Jim Kerri, “Lemoni Sniket: 33 ta baxtsizlik”
Bir vaqtlar Jim Kerriga “Rezina yuz” laqabi berilgan edi. Aktyor faoliyatida murakkab grimlardan iborat filmlar talaygina. Kerri “Niqob” komediyasida yashil yuzli ajabtovur qahramonga aylangan, “Lemoni Sniket: 33 ta baxtsizlik” filmida esa Olaf ismli yovuz va keksa grafni ijro etgan. Bu vaqtda aktyor 40 yoshni qarshi olgan edi.
Bundan bir necha yil avval aktyor “Grinch: Rojdestvo o‘g‘risi” da yashil qiyofali maxluqni ijro etgan.
Mila Yovovich, “Yovuzlik maskani: so‘nggi bob”
“Yovuzlik maskani: so‘nggi bob” nomli zombilar haqidagi jangovar filmida suratga tushish vaqtida Mila Yovovich 46 yosh edi. 85 yoshli Elis obrazini gavdalantirish uchun aktrisa har kuni to‘rt soat vaqtini grim ishlariga sarflagan.
Gari Oldman, “Drakula”
Shunday aktyorlar borki, ular yovuz odamlarni o‘ynash uchun tug‘ilganga o‘xshaydi. Gari Oldman Gollivudning asosiy yovuz qahramoni bo‘lib, u Vlad Drakula rolini mohirona ijro etgan. Pardoz ustalari unga vampir qiyofasiga kirishga yordam bergan: o‘sha paytda 34 yoshda bo‘lgan Oldman filmda mutlaq o‘zgacha qiyofada namoyon bo‘lgan. Qon so‘ruvchi obrazi filmga uchta “Oskar“ mukofotini olib kelgan.
Vaynona Rayder, “Edvard — qaychiqo‘l”
Gari Oldman bilan birga ishlagan Vaynona Rayder ham ekranda vizajistlar tomonidan “qaritilgan”. Tajriba 1990-yilda Tim Bertonning “Edvard — qaychiqo‘l” filmini suratga olish paytida o‘tkazilgan. Pardoz ustalari oldida qiyin vazifa turgan edi, chunki aktrisa atigi 18 yoshda edi. Yosh qizni keksa ayolga aylantirish uchun mutaxassislar bir necha qatlamli grimdan foydalangan va natijada ularning mehnati yuqori baholanib, “Oskar”ga nomzod bo‘lgan. Biroq bazi tomoshabinlar Vaynona qari obrazida ko‘zidan yoshlikka xos nur porlab turganini qayd etishgan.
Sigurni Uiver, “Oppog‘oy: Dahshatli ertak”
Vaynona Rayderning “Begona” filmidagi hamkasbi Sigurni Uiver 90-yillarda keksa ayol obrazini gavdalantirgan. “Oppog‘oy: Dahshatli ertak” filmini suratga olish paytida Sigurni 40 yoshdan oshgan bo‘lsa-da, yosh ko‘rinar edi. Aktrisa fentezida jirkanch va yovuz o‘gay ona rolini o‘ynagan. Jodugar obrazi uchun u Emmi mukofotiga nomzod bo‘ldi.
Tilda Suinton, “Grand Budapesht mehmonxonasi”
“Grand Budapesht mehmonxonasi” komediyasidagi Madam D obrazi filmda qisqa muddatga paydo bo‘lgan bo‘lsa-da, tomoshabinlar xotirasida uzoq saqlanib qoldi. Keksa ayolga o‘xshashi uchun Tilda Suinton besh soat davomida grim qilinadi. Obrazdan chiqish uchun ham ancha vaqt kerak bo‘lgan. Suinton va uning xarakteri o‘rtasidagi farq 30 yosh bo‘lgan.
Izoh (0)