Eron Islom inqilobi qo‘riqchilari korpusi Livanda ko‘plab qurilmalar portlagandan so‘ng o‘z a’zolariga aloqa vositalaridan foydalanishni taqiqladi. Bu haqda maxsus xizmatlardagi manbalarga tayanib, Reuters xabar berdi.
Livanda peyjerlar va ratsiyalar portlashi ortidan Islom inqilobi qo‘riqchilari korpusi deyarli barcha texnik jihozlarni keng ko‘lamli tekshiruvdan o‘tkazgan. Korpus rahbariyati sodir bo‘lgan holatdan xavotirdaligini bildirgan. Eron Livandagi “Hizbulloh” guruhidan texnik ekspertiza natijalarini, shuningdek, detonatsiyaga uchragan buyumlarning bir nechta namunalarini so‘ragan.
Eron, shuningdek, Isroil razvedkasi bilan aloqador va ulardan pul mukofoti olishi mumkin bo‘lgan shaxslarni aniqlash maqsadida qo‘riqchilar korpusi xodimlarini tekshirishni boshlagan.
“Bu jarayon ularning Eron va chet eldagi bank hisoblarini, shuningdek o‘zlari va oila a’zolarining sayohat tarixini puxta o‘rganishni o‘z ichiga oladi”, deyiladi xabarda.
- 17-sentyabr kuni Livanda “Hizbulloh” a’zolari foydalangan yuzlab peyjerlar portladi. Ertasi kuni butun mamlakat bo‘ylab boshqa elektron qurilmalar, jumladan, noutbuklar va ratsiyalar portlay boshladi. 30 dan ortiq kishi halok bo‘ldi, minglab odamlar jarohatlandi.
- Isroil mudofaa vaziri Yoav Galant Livan bilan chegaraga kuchlar va resurslar ko‘chirilayotganini aytdi. “Hizbulloh” rahbari Hasan Nasrulloh hodisada Isroilni ayblab, u barcha qizil chiziqlarni kesib o‘tganini ta’kidladi. Nasrulloh bu harakatlarni urush e’lon qilish bilan teng deb atadi.
- Isroil prezidenti Isxak Gersog mamlakat Livandagi “Hizbulloh” aʼzolarining peyjerlari va ratsiyalari portlashiga aloqador emasligini aytdi. U “Hizbulloh” dushmanlari ko‘p ekanini ta’kidladi.
Izoh (0)