Эрон Ислом инқилоби қўриқчилари корпуси Ливанда кўплаб қурилмалар портлагандан сўнг ўз аъзоларига алоқа воситаларидан фойдаланишни тақиқлади. Бу ҳақда махсус хизматлардаги манбаларга таяниб, Reuters хабар берди.
Ливанда пейжерлар ва рациялар портлаши ортидан Ислом инқилоби қўриқчилари корпуси деярли барча техник жиҳозларни кенг кўламли текширувдан ўтказган. Корпус раҳбарияти содир бўлган ҳолатдан хавотирдалигини билдирган. Эрон Ливандаги “Ҳизбуллоҳ” гуруҳидан техник экспертиза натижаларини, шунингдек, детонацияга учраган буюмларнинг бир нечта намуналарини сўраган.
Эрон, шунингдек, Исроил разведкаси билан алоқадор ва улардан пул мукофоти олиши мумкин бўлган шахсларни аниқлаш мақсадида қўриқчилар корпуси ходимларини текширишни бошлаган.
“Бу жараён уларнинг Эрон ва чет элдаги банк ҳисобларини, шунингдек ўзлари ва оила аъзоларининг саёҳат тарихини пухта ўрганишни ўз ичига олади”, дейилади хабарда.
- 17 сентябрь куни Ливанда “Ҳизбуллоҳ” аъзолари фойдаланган юзлаб пейжерлар портлади. Эртаси куни бутун мамлакат бўйлаб бошқа электрон қурилмалар, жумладан, ноутбуклар ва рациялар портлай бошлади. 30 дан ортиқ киши ҳалок бўлди, минглаб одамлар жароҳатланди.
- Исроил мудофаа вазири Йоав Галант Ливан билан чегарага кучлар ва ресурслар кўчирилаётганини айтди. “Ҳизбуллоҳ” раҳбари Ҳасан Насруллоҳ ҳодисада Исроилни айблаб, у барча қизил чизиқларни кесиб ўтганини таъкидлади. Насруллоҳ бу ҳаракатларни уруш эълон қилиш билан тенг деб атади.
- Исроил президенти Исхак Герцог мамлакат Ливандаги “Ҳизбуллоҳ” аъзоларининг пейжерлари ва рациялари портлашига алоқадор эмаслигини айтди. У “Ҳизбуллоҳ” душманлари кўп эканини таъкидлади.
Изоҳ (0)