Shanxayga 16-sentyabr kuni so‘nggi 75 yildagi eng kuchli “Bebinka” tayfuni yopirildi. Bu haqda Xitoy markaziy meteorologiya boshqarmasi xabar berdi.
Ma’lum qilinishicha, “Bebinka” Shanxayga mahalliy vaqt bilan soat 07:30 da yetib kelgan. Shamolning maksimal tezligi sekundiga 42 metrga yetgan.
“Bebinka” “Gloriya” tayfunidan o‘tib ketdi va 1949-yildan beri Shanxayga yetib kelgan eng kuchli tayfunga aylandi, deya ta’kidladi xitoylik meteorologlar.
Taxminlarga ko‘ra, Shanxaydan o‘tgach, tayfun g‘arbiy shimoli-g‘arbga soatiga taxminan 25 kilometr tezlikda harakatlanadi. “Bebinka”ning kuchi asta-sekin pasayib, 17-sentyabrga o‘tar kechasi Anxoy va Xenan provinsiyalari chegarasida tropik depressiya darajasigacha susayadi. Rasmiylar aholiga o‘ta zarurat bo‘lmasa, xavfsiz boshpanalarni tark etmaslikni tavsiya qilmoqda.
Avvalroq Markaziy va Sharqiy Yevropani larzaga solgan “Boris” bo‘roni oqibatida kamida olti kishining halok bo‘lgani ma’lum qilingandi. Ruminiyada suv toshqini qurbonlari to‘rt kishini tashkil etgan. Tabiiy ofat tufayli besh mingdan ortiq uy-joy zarar ko‘rgan. Daryolarda suv sathi ko‘tarilib, minglab uylar suv ostida qolgan. Polsha va Chexiyada suv toshqinlari tufayli Ukrainaga bir qator poyezdlar harakati to‘xtagan, Chexiya va Polshada to‘g‘on yorilgan.
Izoh (0)