Donald Trampga golf maydonida suiqasd uyushtirmoqchi bo‘lgan Rayan Rut agar urinishi muvaffaqiyatsiz yakunlansa, o‘qish uchun bir necha oy oldin xat yozib qo‘ygani aniqlandi. Xat Rayan Rut do‘stining uyidagi qutidan topilgan. Bu haqida Politico sud hujjatlariga tayanib xabar berdi.
Maktubda Rayan Rut Donald Trampga suiqasd uyushtirishni rejalashtirganini ma’lum qilgan va agar urinishi o‘xshamay qolsa, uning ishini yakunlab qo‘yishni boshqalardan so‘ragan. Buning uchun Rut 150 ming dollar va’da qilgan.
“Bu Donald Trampga suiqasd edi, lekin men muvaffaqiyatsizlikka uchradim. Men qo‘limdan kelganini qildim va bunga barcha qobiliyatimni sarfladim. Endi ishni tugatish sizga bog‘liq. Kim ishni yakunlay olsa, men 150 ming dollar taklif qilaman”, deb yozadi Rut.
Shuningdek, u xatda Tramp prezident bo‘lishga noloyiq ekanini ham yozgan. 15-sentyabr kuni Donald Tramp golf o‘ynayotgan klub yonida otishmalar sodir bo‘ldi. Tramp otishma sodir bo‘lgan joydan bir necha yuz metr narida bo‘lgan.
Maxfiy xizmat xodimi butalar orasidan chiqib qolgan qurol stvolini payqab, hamkasblari bilan birga darhol o‘sha tomonga o‘t ochgan. Shundan so‘ng gumonlanuvchi butalar orasidan chiqib, qora Nissan’ga o‘tirib, qochib ketgan. Politsiya uni Martin okrugiga olib boradigan katta yo‘lda qo‘lga olgan.
Rasmiylar Trampga suiqasd qilishda gumonlanayotgan shaxs 58 yoshli Rayan Uesli Rut ekanini xabar qilgan. U ikki modda bo‘yicha 20 yilgacha qamoq jazosiga hukm qilinishi mumkin.
Izoh (0)