Qirg‘iziston prezidenti Sadir Japarovning hibsdagi jiyani Ulan Japarov uy qamog‘iga olindi. Bu haqda Bishkekning Pervomay tuman sudiga tayanib, 24.kg xabar berdi.
Qaror 24-avgust kuni qabul qilingan. Sud poytaxt bo‘yicha davlat xavfsizlik xizmati tergov bo‘limi tergovchisining iltimosnomasini qanoatlantirgan.
“U.J.ga nisbatan ilgari qo‘llangan qamoqqa olish tarzidagi ehtiyot chorasi tergov muddatiga, ya’ni 19-sentyabrga qadar uy qamog‘i bilan almashtirildi”, deyiladi qarorda.
Ulan Japarov 2023-yil huquqni muhofaza qilish organlari tomonidan Qirg‘iziston Jinoyat kodeksining korrupsiya moddasi bo‘yicha hibsga olingandi. To‘rt oydan keyin u uy qamog‘iga qo‘yib yuborilgan.
“Qolgan qarindoshlarim uchun saboq bo‘lsin”, degandi o‘shanda prezident Sadir Japarov.
2024-yilning iyul oyida prezident qarindoshi DXX tomonidan qo‘lga olingandi. Bu safar u og‘ir jinoyat sodir etganlikda ayblanmoqda, buning natijasida jabrlanuvchiga juda ko‘p miqdorda moddiy zarar yetkazilgan. Ulan Japarov Qirg‘iziston prezidentining amakivachchasi Raqimjon Japarovning o‘g‘li hisoblanadi.
Izoh (0)