Қирғизистонда полиция ходимларини видеога олишни тақиқлаш таклифи илгари сурилмоқда.
Жогорку Кенешнинг бир қатор депутатлари Жиноят кодекси ҳамда Қоидабузарлик кодексига ўзгартишлар киритишни таклиф қилган. Қонун лойиҳаси парламентга тақдим этилган.
Далолатномада қайд этилганидек, лойиҳанинг мақсади ва вазифаси давлат мансабдор шахсига ёки бошқа шахсга қаршилик кўрсатиш билан боғлиқ ҳуқуқий ҳимоя стандартларини киритиш ва безорилик учун жазо чораларини кучайтириш, жамоат хавфсизлигини таъминлаш бўйича давлат кафолатлари самарадорлигини ошириш, жамоат тартибини муҳофаза қилиш бўйича вазифаларни бажараётган ички ишлар органи ходимининг қонуний талабига бўйсунмаганлик учун жавобгарликни кучайтиришдан иборат.
Қирғизистон ИИВ маълумотларига кўра, 2022 йилда ички ишлар органлари ходимларининг қонуний талабларини бажармаслик бўйича 82 та, 2023 йилда эса 128 та ҳолат қайд этилган бўлиб, бу ҳолатлар сони ортганидан далолат беради.
Қонун лойиҳаси ички ишлар органлари ходимларининг обрўсини тушириш ёки ҳақорат қилиш, жамият наздида камситиш мақсадида ўз хизмат вазифаларини бажаришига қонунга хилоф равишда аралашиш, фотосурат ва видеога олиш ҳамда интернет сайтларида тарқатиш ҳолатларини назоратга олишни назарда тутади.
Ички ишлар органлари ходимларининг фаолиятини обрўсизлантириш учун интернет тармоғида материалларни кейинчалик тарқатиш мақсадида фото ва видеога олиш 5 минг қирғиз сўми (тахминан 60 доллар) миқдорида жарима солишга ёки беш суткадан етти суткагача қамоққа олишга сабаб бўлади.
Изоҳ (0)