Qirg‘iz Respublikasi prezidenti Sadir Japarov o‘zbekistonlik boks murabbiyi Akmal Hasanov bilan uchrashib, unga Munarbek Seyitbek uuluning Parijdagi Olimpiya o‘yinlaridagi g‘alabasiga qo‘shgan hissasi uchun minnatdorlik belgisi sifatida Chevrolet Tracker avtomobilini sovg‘a qildi.
Prezident Hasanov bilan suhbatda uning harakati Qirg‘iziston va O‘zbekiston xalqlarining do‘stligi va birligini tarannum etganini alohida taʼkidladi.
“Markaziy Osiyo xalqlari bir-birini qo‘llab-quvvatlab, hamjihatlik, do‘stona munosabatlarni namoyon etishini butun dunyo ko‘rdi. Sport tinchlik elchisi deb ataladi. Siz o‘z namunangiz bilan o‘zaro totuvlikni mustahkamlashga hissa qo‘shdingiz. Birligimiz yanada mustahkamlanishini tilayman”.
Prezidentning qayd etishicha, Hasanov qirg‘izistonlik bokschiga ayni vaqtida yordam bergan.
“Ajdodlarimiz, ota-bobolarimiz minnatdorchilik belgisi sifatida ot sovg‘a qilganlar. Hozirda mashina sovg‘a qilish odat tusiga kirgan bo‘lsa-da, an’ana ruhi o‘zgarishsiz qolmoqda – bu beqiyos xizmatlari uchun hurmat va minnatdorlik ifodasidir”, — deya qo‘shimcha qildi davlat rahbari.
Shuningdek, Japarov Parij Olimpiadasida o‘zbekistonlik sportchilarning yuksak natijalar ko‘rsatganini ham ta’kidlab o‘tgan.
Akmal Hasanov samimiy so‘zlar uchun minnatdorchilik bildirib, Seyitbek uulu bilan yig‘inlarda ko‘p marta uchrashganini, shuning uchun hech ikkilanmay uning murabbiyi bo‘lishga qaror qilganini aytdi.
Ma’lumot uchun, Akmal Hasanov Parijda qirg‘izistonlik bokschi Munarbek Seyitbek uuluning 3 ta jangida murabbiylik qildi. Finalda Seyitbek uulu o‘zbekistonlik bokschi bilan jang qildi va mag‘lubiyatga uchrab Olimpiada kumush medali bilan taqdirlandi.
Izoh (0)