Toshkentda “Hamshiralar uchun Germaniya tibbiyot akademiyasi” tashkil etiladi, deb xabar bermoqda Kambag‘allikni qisqartirish va bandlik vazirligi matbuot xizmati.
Qayd etilishicha, shu vaqtgacha Germaniyada tibbiyot sohasida ishlash istagida bo‘lgan fuqarolar ushbu davlatga borgach, 6-8 oy vaqtini moslashish uchun sarflagan. Yangi loyihaga ko‘ra bunday bo‘lmaydi. O‘zbekistonning o‘zida kasb va tilga maqsadli o‘qitiladi.
Bu haqda Samarqandda Kambag‘allikni qisqartirish va bandlik vazirligi hamda Germaniyaning Globogate Concept AG konserni o‘rtasida imzolangan hamkorlik shartnomasida belgilab qo‘yildi.
“Hamshiralar uchun Germaniya tibbiyot akademiyasi” “Davolash bo‘yicha Yevropadagi ikkinchi yirik universitet klinikasi Aaxen bilan birgalikda Toshkentdagi Abu Ali Ibn Sino nomidagi 1-Respublika tibbiyot texnikumi bazasida nemis tibbiy-ta’lim dasturlari asosida tashkil qilinadi.
“Bir yil davomida kasb va til o‘rgatiladi. Muhimi, ular diplom olish bilan bir qatorda Germaniyada ishlash huquqini beruvchi kasbiy sertifikatni ham qo‘lga kiritadi”, dedi Globogate Concept AG konserni bosh direktori Sang Vu Pay.
Shartnomada fuqarolarning huquqlari ikki davlat qonunlari bilan himoya qilinishi belgilab qo‘yilgan.
Hamshiralar akademiyasi tashkil etilishi haqida prezidentning 20-iyundagi “Ma’muriy islohotlar doirasida sog‘liqni saqlash sohasida davlat boshqaruvini samarali tashkil qilish chora-tadbirlari to‘g‘risida”gi qarorida belgilangandi.
Kambag‘allikni qisqartirish va bandlik vaziri Behzod Musayev “O‘zbekiston 24” telekanaliga bergan intervyusida 2024-yilda O‘zbekistondan 800 nafardan ortiq hamshira Germaniyaga tashkiliy holda yuborilishi, ularning oyligi kamida 2200 ming yevro ekanini aytgandi.
Mart oyida Behzod Musayev Germaniyaning Mangold Consulting Gmbh kompaniyasi prezidenti Klaus Mangold hamda boshqaruvchi direktor, doktor Kristof Mangold bilan uchrashib, xorijda ishlovchilar uchun sharoitlar, kasb-hunarga o‘qitish va o‘zbekistonliklarni Germaniyada talab yuqori bo‘lgan ishlarga jalb qilish masalalarini muhokama qilgandi.
Suhbat davomida Germaniyadagi katta demografik jarayonlar bois boshqa davlatlardan mehnat kuchiga talab ortib borayotgani, jumladan, 1000 dan ortiq shifoxonalarga tibbiyot xodimlari yetishmayotgani va bu borada O‘zbekiston tomoni ushbu bo‘shliqni to‘ldirishga tayyorligi aytilgandi.
Izoh (0)