Kambag‘allikni qisqartirish va bandlik vaziri Behzod Musaev Germaniyaning Mangold Consulting Gmbh kompaniyasi prezidenti Klaus Mangold hamda boshqaruvchi direktor, doktor Kristof Mangold bilan uchrashdi. Bu haqda vazirlik matbuot xizmati xabar berdi.
Qayd etilishicha, uchrashuvda xorijda ishlovchilar uchun sharoitlar, kasb-hunarga o‘qitish va o‘zbekistonliklarni Germaniyada talab yuqori bo‘lgan ishlarga jalb qilish masalalari muhokama qilingan.
Ayni paytda Germaniyadagi katta demografik jarayonlar bois boshqa davlatlardan mehnat kuchiga talab ortib bormoqda. Bugungi kunda O‘zbekistondan tibbiyot yo‘nalishidagi mutaxassislar Germaniyada ish faoliyatini olib bormoqda.
Mazkur yo‘nalishda hali hamon ish kuchiga talab kattaligi bildirib o‘tildi. Jumladan, Germaniyadagi 1000 dan ortiq shifoxonalarga tibbiyot xodimlari yetishmayotgani va bu borada O‘zbekiston tomoni ushbu bo‘shliqni to‘ldirishga tayyorligi ta’kidlandi. Biroq ushbu jarayonni til bilishdagi muammolar sekinlashtirib yuborayotgani va bu borada til bo‘yicha qo‘yilgan talablarni yumshatish taklif etildi. Jumladan, nemis tili o‘quv kurslari muddatini qisqartirish zarurligi bildirildi, — deyiladi xabarda.
Shuningdek, uchrashuvda nafaqat tibbiyot yo‘nalishidagi balki metallni qayta ishlash korxonalaridagi mexatronika, logistika, yuk avtomobili haydovchiligi yo‘nalishlariga katta talab borligi aytib o‘tilgan. O‘z navbatida barcha kelishuvlarni tezroq hayotga tatbiq etish uchun huquqiy asoslarni ishlab chiqishga kelishib olingan.
Mart oyining boshlarida o‘zbekistonliklar 1,7 ming dollar maosh bilan Germaniyaga ishga taklif qilinayotgani to‘g‘risida xabar berilgandi. Bunda ulardan Gyote, ECL, ÖsD yoki TELC’dan olingan nemis tili bo‘yicha kamida A2 sertifikati talab qilinadi.
Izoh (0)