Raqobatni rivojlantirish va isteʼmolchilar huquqlarini himoya qilish qo‘mitasi tomonidan fuqarolarning murojaatlari asosida nazorat xaridi tadbiri o‘tkazildi. Bu haqda qo‘mita matbuot xizmati xabar berdi.
Maʼlum qilinishicha, unda “X Xasanboy va xolod” MCHJ tomonidan ishlab chiqarilgan qadog‘ida shakarsiz deb ko‘rsatilgan “Xottabich” nomli muzqaymoqning 7 ta turi xarid qilindi va belgilangan tartibda akkreditatsiyadan o‘tkazilgan uchta laboratoriyaga topshirildi.
Sanitariya-epidemiologiya nazorati boshqarmasi laboratoriyasining xulosasiga ko‘ra, muzqaymoq qadog‘ida shakarsiz deb ko‘rsatilgan “Xottabich” nomli muzqaymoqning “Eskimo”, “Bananli”, “Fistashkali”,“Shokoladli”, “Olxo‘ri mevali” va “Plombir” turlari tarkibida ichak tayoqchasi guruhidagi bakteriyalar aniqlandi. Shu bois bakteriologik ko‘rsatkichlari bo‘yicha SanPin 0366-19 talablariga nomuvofiq deb topildi.
“Texnostandart-neo” MCHJning akkreditatsiyadan o‘tgan laboratoriyasi xulosasiga ko‘ra, qadog‘ida shakarsiz deb ko‘rsatilgan “Xottabich” nomli muzqaymoqning “Eskimo”, “Bananli”, “Fistashkali”, “Shokoladli” kabi turdagi mahsulotlar tarkibida shakar miqdori belgilangan meʼyorlardan ikki barobarga ko‘pligi yaʼni, belgilangan meʼyor 14,5 - 17,5 foiz o‘rniga 37,7 -38,1 foiz ekanligi maʼlum bo‘ldi. “Olma mevali” plombir mahsulotida esa aksincha saxaroza miqdori meʼyordan kamligi aniqlandi.
Texnik jihatdan tartibga solish sohasida nazorat inspeksiyasining mahsulot markirovkasi (qadog‘i) bo‘yicha bergan xulosasiga ko‘ra, qadog‘ida shakarsiz deb ko‘rsatilgan “Xottabich” nomli muzqaymoqning “Eskimo”, “Bananli”, “Fistashkali”, “Shokoladli”, “Olxo‘ri mevali”, “Olma mevali” va “Plombir” kabi turdagi mahsulotlarda isteʼmolchiga tegishli bo‘lgan 10 ga yaqin zarur maʼlumotlar taqdim etilmagan.
Mazkur holatda MCHJ tomonidan ishlab chiqarilgan qadog‘ida shakarsiz deb ko‘rsatilgan “Xottabich” nomli muzqaymoqning “Eskimo”, “Bananli”, “Fistashkali”, “Shokoladli”, “Olxo‘ri mevali”, “Olma mevali”va “Plombir” kabi turdagi mahsulotlari tarkibi hamda Oziq-ovqat mahsulotini tamg‘alash yuzasidan uning xavfsizligi to‘g‘risidagi umumiy texnik reglament talablariga nomuvofiqligi aniqlangan.
“Shuningdek, o‘rganish davomida ushbu muzqaymoqlarning qadog‘ida ‘Muzqaymoqni isteʼmol qilish vazningizni kamaytirishda, immunitetni oshirish va stressdan chiqishda yordam beradi, shuningdek, yaxshi kayfiyat taqdim etadi’ degan maʼnodagi yozuvlarini tasdiqlovchi hech qanday xulosalar mavjud emasligi aniqlandi.
Amaldagi texnik jihatdan tartibga solish hujjatlariga nomuvofiq mahsulotlarni isteʼmolchilardan qaytarib olish bo‘yicha tegishli choralarni ko‘rish uchun to‘plangan hujjatlar Texnik jihatdan tartibga solish agentligiga yuborildi”, deyiladi xabarda.
Izoh (0)