Ukraina tashqi ishlar vaziri Dmitriy Kuleba lavozimidan ozod etildi. Bu haqda deputat Yaroslav Jeleznyak xabar berdi.
Ukraina Oliy Radasida 240 nafar deputat Kulebaning iste’fosi uchun ovoz berdi, faqat bir kishi qarshi chiqdi. Siyosatchi hafta boshida bir qancha vazirlar va bosh vazir o‘rinbosarlari kabi iste’fosini Ukraina parlamentiga taqdim etgandi. 5-sentyabr kuni Oliy Radada bu masala bo‘yicha ovoz berish bo‘lib o‘tdi.
Jarayonda Dmitiry Kuleba ishtirok etmagan va hisobot taqdim qilmagan. Ukraina TIV rahbarligiga asosiy nomzod tashqi ishlar vazirining amaldagi birinchi o‘rinbosari Andrey Sibiga bo‘lishi kutilmoqda.
4-sentyabr kuni Ukraina Oliy Radasi strategik sanoat vaziri Aleksandra Kamishin, adliya vaziri Denis Malyuska, atrof-muhitni muhofaza qilish va tabiiy resurslar vaziri Ruslan Strelets hamda bosh vazirning yevrointegratsiyasi bo‘yicha o‘rinbosari Olga Stefanishinani lavozimidan ozod qildi.
- Ukrainalik siyosatchi Dmitriy Kuleba 1981-yil 19-aprelda Sumi shahrida tug‘ilgan. 2003-yilda Taras Shevchenko nomidagi Kiyev milliy universitetining Xalqaro munosabatlar institutini xalqaro huquq mutaxassisligi bo‘yicha imtiyozli diplom bilan tamomlagan. Yuridik fanlar nomzodi (2006).
- 2019-yil avgustdan 2020-yil martgacha — Ukrainaning Yevropa va Yevroatlantika integratsiyasi bo‘yicha bosh vazir o‘rinbosari. 2020-yil 4-martdan Ukraina tashqi ishlar vaziri etib tayinlangan.
Izoh (0)