Ukraina Oliy Radasi strategik sanoat vaziri Aleksandra Kamishin, Adliya vazirligi rahbari Denis Malyuska, atrof-muhitni muhofaza qilish va tabiiy resurslar vaziri Ruslan Strelets hamda bosh vazirning yevrointegratsiyasi bo‘yicha o‘rinbosari Olga Stefanishinani lavozimidan ozod qildi.
Biroq parlament Irina Vereshchukning vaqtincha bosib olingan hududlarni reintegratsiya qilish vaziri lavozimidan va Vitaliy Kovalning Davlat mulk jamg‘armasidan iste’foga chiqishini qo‘llab-quvvatlamagan. RBK-Ukraina agentligining “Xalq xizmatkori” fraksiyasidan suhbatdoshi, Kovalning ishdan bo‘shatilishi uning keyinchalik Agrar siyosat vazirligi boshlig‘i etib tayinlanishiga e’tiroz bildirgan ayrim fraksiya deputatlari tomonidan sabotaj qilinganini aytgan.
“Vereshchukka kelsak, u bosh vazir o‘rinbosari lavozimidan chetlatilishidan mamnun emasdi va bu haqda deputatlarga xabar bergan, natijada sodiq “xizmatchilar”i uning ishdan olinishini qo‘llab-quvvatlamagan”, deb yozadi agentlik.
Iste’foga chiqish to‘g‘risida ariza yozgan Ukraina TIV rahbari Dmitriy Kuleba hamon ishdan bo‘shatilishini kutmoqda. RBK-Ukraina suhbatdoshining aniqlik kiritishicha, bir qator sabablarga ko‘ra Kuleba bo‘yicha ovoz berish ertasi kunga qoldirilgan.
Agentlik manbalarga tayanib, Kuleba “muhim elchixonalardan birini” boshqarishi mumkinligini ta’kidlagan. Ukraina prezidenti Vladimir Zelenskiy Kulebaning yangi lavozimga tayinlanishi haqida aniq javob bermagan va “bu haqda gapirishga hali erta” ekanligini aytgan.
“Ukrainska pravda” nashrining avvalroq nomi oshkor etilmagan suhbatdoshlari taʼkidlashicha, Dmitriy Kuleba isteʼfoga chiqqan taqdirda Ukraina TIV rahbarligiga asosiy nomzod tashqi ishlar vazirining amaldagi birinchi o‘rinbosari Andrey Sibiga bo‘ladi.
Izoh (0)